2018 йилдан бошлаб ёнғоқ навлари клонлаштирилади

Кўргазмада кўргазмасида замонавий қишлоқ хўжалиги техникаси ва эҳтиёт қисмларини ишлаб чиқариш, деҳқончилик, чорвачилик, паррандачилик, ветеринария технологиялари ва маҳсулотларини қайта ишлаш, сақлаш ва ташишга ихтисослашган корхона-ташкилотлар маҳсулотлари намойиш этилмоқда. Германия, Россия, Беларусь каби етакчи ишлаб чиқарувчиларнинг янги қишлоқ хўжалиги техникалари тақдим этилган.

Стендларда маҳаллий ишлаб чиқарувчиларнинг кўплаб янги инновацион лойиҳалари билан танишиш мумкин. Лазерли ер текислаш ускунаси (ҳосилдорликни 20%га оширади), йўл-қурилиш, қишлоқ хўжалиги, коммунал тармоқ ва бошқа соҳалар техникасининг янги турлари, инновацион ветеринария препаратлари, вакциналар, антибиотиклар, витамин ва дезинфекцияловчи воситалар шулар жумласидандир.

Хусусан, интенсив боғлар барпо этиш бўйича бир қанча лойиҳа ҳавола этилган.

Ёнғоқ ишлаб чиқарувчилар ва экспорт қилувчилар уюшмаси технологи Илёс Ҳайдаров:

– Биз маҳаллий иқлим шароитимизга мослаштирилган ёнғоқ, бодом, писта ва зайтуннинг замонавий плантацияларини яратиш дастурини ишлаб чиқдик. Фермерларга ёнғоқзорлар ташкил қилишда амалий кўмак бераётирмиз. Ҳозир Самарқанд вилояти Жомбой туманида 500 гектарлик ёнғоқзор барпо этилди. Сурхондарё, Жиззах вилоятларида ерлар тайёрланмоқда. Лаборатория қурилмоқда, унда 2018 йилдан бошлаб четдан келтирилган ёнғоқ навларини клонлаштиришни йўлга қўямиз.

Фозила Ашурова, мухбиримиз.