Адвокатлар палатаси раисининг 20.11.2017 йилдаги 1-кх-сон буйруғи билан Адвокатлик тузилмаларининг янгиланган намунавий ишлар номенклатураси тасдиқланди. Бу ҳақда Адлия вазирлигининг расмий сайтида хабар берилади.
Бу адвокатлик тузилмалари фаолиятида ҳужжатлар билан ишлашни соддалаштириш ва ходимлар учун қулайликлар яратишга хизмат қилади, дейилади хабарда. Янги ишлар номенклатураси 2017 йил 1 декабрдан жорий этилди.
Агар аввал ҳар бир адвокатлик тузилмасида 60 дан ортиқ ишлар ва 29 та китоб юритиш зарур бўлган бўлса, эндиликда фақат 10 та иш (яъни ишлар сони 6 марта қисқарди) ва 7 та рўйхатга олиш китобини (қисқартириш – 4 марта) юритиш тавсия этилади.
Буйруқни тайёрлашда тажрибали амалиётчиларнинг таклифлари ҳам инобатга олинган. Янги намунавий ишлар номенклатураси ва китоблар билан ҳавола бўйича танишиш мумкин.
