Президент Шавкат Мирзиёев 29 апрель куни пандемия даврида аҳолини озиқ-овқат маҳсулотлари билан таъминлаш ва нарх-наво барқарорлигини сақлаш масалаларига бағишланган видеоселектор йиғилиши ўтказди.
Мамлакатимизда санитар-эпидемиологик вазият аста-секин барқарорлашиб бораяпти, деб таъкидланди йиғилишда, карантиндан босқичма-босқич чиқиш бўйича навбатдаги қадамларни қўйиш вақти келди.
Санитария-эпидемиология ҳолатининг ижобий динамикасини инобатга олган ҳолда қуйидагиларга рухсат бериш режалаштирилмоқда:
- хавфсизлик чораларига қатъий риоя қилган ҳолда кўп қаватли уйларнинг ички ҳовли ва ҳудудларида ота-оналар ҳамроҳлигида болаларини сайр қилдиришга;
- қишлоқ хўжалиги маҳсулотлари нобуд бўлишининг олдини олиш мақсадида - мева-сабзавот ва полиз маҳсулотларини жойларга етказиш ва сотиш учун вилоятлараро ва шаҳарлараро қатновларни амалга оширишга;
- олимлар, ИТИлари ходимлари, профессор-ўқитувчиларга санитария-гигиена нормаларига риоя қилган ҳолда ўз лаборатория ва кафедраларида фаолиятларини давом эттиришларига.
10 майдан кейин карантин режимини босқичма-босқич юмшатишга қаратилган ишлар давом эттирилади.
