Метронинг Юнусобод йўналиши қурилиши 2019 йилда тугатилади

Сергели йўналишида лифт ва эскалаторлар бўлади

Тошкент метрополитенининг Сергели линияси қурилиши эса 2020 йилга қадар қуриб, фойдаланишга топширилиши режалаштирилган. Эътиборлиси, Сергели метро линияси ҳозиргача Марказий Осиёда қўлланилмаган бутунлай янгича эстакада усулида бунёд этилмоқда. Мазкур линия кўприксимон кўринишга эга бўлиб, поездлар ер устида ҳаракатланади.

МДҲ давлатлари орасида янгилик бўлиши кутилаётган Сергели метроси қурилиши бошлангани ҳақида аввал хабар берган эдик.

Қизиқарли яна бир жиҳат, поездлар тўхташ жойи, яъни бекатлар 4 вагондан иборат метро поездига мўлжаллаб қурилади. Бекатларда йўловчиларга қулайлик яратиш мақсадида махсус лифт ва эскалаторлар ҳам ўрнатилади.

Йўл қурилиши соҳасидаги яна бир йирик лойиҳа

Бу ер усти метро ҳалқа йўли қурилишининг умумий узунлиги 52,1 километрни ташкил этади. Ушбу йўналиш бўйича поездларнинг ўртача ҳаракат тезлиги соатига 60 км.га етади. Ҳалқа бўйлаб йўлни босиб ўтиш вақти 1 соат-у 10 дақиқа этиб белгиланган.

Дастлабки босқичда Тошкент метрополитенининг "Дўстлик" бекатидан Қўйлиқ бозоригача бўлган 8 бекатдан иборат қисми қурилади. Кейинчалик у "Олмазор", “Беруний”, “Бодомзор” ҳамда “Тузел” бекатлари орқали яна “Дўстлик” бекатига туташади. Мазкур метро йўли Яшнобод, Учтепа, Олмазор, Юнусобод, Чилонзор ва Сергели туманлари ҳудудидан ўтади. Режага кўра ушбу метро линиясида 35 бекат қурилади.

Фозила Ашурова, мухбиримиз.