Янги хизмат – gis.uzedu.uz – ота-оналарга ўзларининг микроҳудудлари ва уларнинг ҳудудларидаги мактабларни аниқлаб олиш имкониятини беради. Бу ҳақда Халқ таълими вазирлиги хабар берди.
Хизмат Халқ таълими соҳасида АКТни ривожлантириш маркази томонидан яратилган. Ҳозирги кунда мазкур хизмат тест режимида фаолият юритмоқда. Онлайн харитага Тошкент шаҳридаги барча мактаблар микроҳудудлари билан киритилган. Шунингдек республикадаги барча мактаблар жойлашувини кўриш мумкин. Келажакда хизмат кенгайтирилиб, республикадаги барча мактабларнинг микроҳудудларини кўриш имконияти яратилади.
Хизматдан фойдаланиш учун сайтга кириш керак ва Toshkent shahri xalq ta’limi bosh boshqarmasi ни ҳамда тегишли туманни танлаш лозим. Шундан кейин Maktablarni ko‘rish тугмасини босиш керак ва тизим харитада мактабларни кўрсатади (қизил билан янги қабул тизими жорий этилаётган мактаблар белгиланган).
Мактабларнинг микроҳудудлари туман ҳокимликлари қарори билан тасдиқланади.
