Қишда таътил олганда... қаерга бориш мумкин?

Маҳаллий туроператорларнинг таклифларини кўриб чиқишдан олдин ўз меҳнат таътилингизни қандай иқлим шароитида ўтказишни исташингизга аниқлик киритиб олиш даркор. Самода ўтказилган бир неча соат Сизни хорижий мамлакатлардаги тропик пляжлар ёки қор билан қопланган тоғли ўлкаларга ё бўлмаса, қишки ҳаво бахмал кузни эслатувчи мўътадил иқлимли кенгликларга элтиб қўйиши мумкин.

1. «Денгизда, илиққина денгизда …»

Январь ойида ҳаво ҳарорати 30 даражадан ортиқ бўладиган ўлкалар унчалик кўп эмас. Сув ҳарорати ҳам катта роль ўйнайди. Чўмилиш учун 18-28°С айни муддао. Январь ойида бундай илик денгиз сувини Миср, Исроил, БАА, Иордания, Гоа, Шри-Ланка, Таиланд, Вьетнам, Камбожа, Бирма, Куба, Доминикана, Бали, Индонезия, Мексика, Австралия, Перу, Мальдив ҳамда Сейшел оролларидан топса бўлади. Бундай мамлакатларга бориш – ўтиб кетган ёз кетидан қувишдек гап, бунинг устига чел эл маданияти экзотикасидан баҳраманд бўлиш имконияти туғилади.

Келинг, қуйида пойтахтимиздаги еттита сайёҳлик агентликларининг таклифларини кўриб чиқамиз. Мақолани эълон қилишдан мақсад аниқ ҳисоб-китобларни ҳавола этиш ёки алоҳида сайёҳлик фирмаларини реклама қилиш эмаслигига эътиборингизни қаратмоқчимиз¹. Шунчаки бозорнинг мазкур соҳасидаги мавжуд ўзгаришлар ва нарх-наво сиёсати билан таништирмоқчимиз, холос.

Айтиш жоизки, келтирилган жадвалда турларнинг тахминий нархи акс  этган, уларга одатга кўра: кутиб олиш ва кузатиш, меҳмонхонага жойлаштириш ва нонушта; мамлакат ичидаги объектлар ёки шаҳарлар бўйлаб транспортда олиб юриш баҳолари киритилган. Баъзи агентликларнинг таклифлари визаларни расмийлаштириш, Ўзбекистондан учиш ва қайтиш, тушлик ҳамда кечки овқатлар, суғурта полисларини ҳам ўз ичига олади. Тур дастурига киритилмаган шопинг ҳамда бошқа кўнгилочар машғулотларга ҳар доим алоҳида ҳақ тўланади.

2. Қорли тоғли чўққилар ва бепоён текисликлар

Сиз учун тоғдан яхшиси фақат қадамингиз ҳали етмаган чўққилар ва тепаликлар бўлса ёки қордаюрар автомашиналарда бепоён қорли текисликларни кезишни орзу қилсангиз, унда совуқ кенгликларда ҳордиқ чиқаришни танлаганингиз маъқул. Булар Швейцария ва Австрия, Қозоғистон, Абхазиянинг тоғ-чанғи курортларидир. Қиш фаслида мамлакатимизнинг санаторийлари ва тоғлари бағрида ҳордиқ чиқариш – алоҳида мавзу, унга Normанинг алоҳида махсус таҳлили бағишланади.

Мазкур мақолада “қорли йўналишлар” бўйича ҳам таклифлар билан таништирмоқчи бўлгандик. Аммо таҳлил шуни кўрсатдики, бундай турларга нархларни ўз сайтида жойлаштирган операторлар жуда камчиликни ташкил этар экан. Улар аниқ ҳисоб-китоб қилиш учун шахсан қўнғироқ қилиш ёки келиб аниқлаштиришни таклиф этишди.

3. Шопинг ёҳуд Европа ўлкаларига саёҳат

Агар денгиз бўйида дам олиш ёки тоғ-чанғи спорти ихлосманди бўлмасангиз, қадимий шаҳарлар, меъморий обидалар ва маданий марказлар  бўйлаб экскурсияли саёҳатга отланишингиз ва/ёки байрамолди чегирмалар (sales) даврида дўконлар бўйлаб арзон нархларда ул-бул харид қилишга киришсангиз бўлади. Агар экскурсия ва шопинг қилишни мақсад қилган бўлсангиз, бир нечта мамлакатлар бўйича тайёр турларни сотиб олишингиз мумкин. Эътиборингизга шундай турларнинг бир нечтасини ҳавола этамиз:

Бундай саёҳатларни қилавериб, тажрибаси анча ошган одамларнинг фикрига кўра, Рождество байрами арафасидаги энг қизиқарли чегирма акциялари Нью-Йорк, Лондон, Вена, Рим, Милан, Мадрид, Берлин, Прага, Хельсинки, Таллин, Афина, Дубай каби шаҳарларда бўлиб ўтади.

***

Norma.uz томонидан илгари эълон қилинган мақолаларда туроператор билан шартнома тузиш, виза олиш, хорижий давлатда бўлган давр учун суғурта қилиш, болаларни чет давлатга олиб чиқиш сингари хорижга сафарни режалаштириш пайтида эътибор қаратиш лозим бўлган масалалар мавзулари батафсил очиб берилган эди. Улар билан қуйидаги ҳаволалар орқали танишиб чиқишни таклиф этамиз. 

Саида Жонизоқова,

мухбиримиз

Мавзуга оид материаллар:

Кетаётиб, чироқни ўчиринг! Таътил ёки хизмат сафарига кетаётганлар учун эслатма 

Турфирмадан йўлланма ва шартнома билан

Халқаро валюта картаси қандай очилади 

¹ Мазкур таҳлилда келтирилган сайёҳлик агентликлари муаллифнинг шахсий танловига асосан эмас, балки излаш тизимларининг илк натижаларига кўра танланган.