Суд ва ДСБ: банкротлик ҳақида ариза топширинг – солиқ қарзи I ярим йилликда ҳисобдан чиқарилади

Тошкент туманлараро иқтисодий суди ва пойтахт Давлат солиқ бошқармаси томонидан ўтказилган семинарда собиқ якка тартибдаги тадбиркорларнинг солиқ қарзини ҳисобдан чиқариш бўйича режалар хусусида сўз борди. Бу ҳақда ЎзА хабар берди.

Тошкент шаҳрида 500 дан ортиқ собиқ якка тартибдаги тадбиркорларнинг 8,6 млрд сўм миқдорида солиқ қарзи мавжуд экани таъкидланди.

«Банкротлик тўғрисида»ги Қонунга киритилган тузатишлар бундай таомилни якка тартибдаги тадбиркор мақомини йўқотган жисмоний шахсларга нисбатан қўллаш имконини бериши муносабати билан солиқ органларида ушбу таомил орқали солиқ қарзини умидсиз деб топиш ва уни ҳисобдан чиқариш учун асос пайдо бўлди. Тузатишлар шарҳи билан бу ерда танишиш мумкин.

Агар шу йилнинг биринчи чораги якунига қадар банкротлик очишга доир аризалар киритилса, ҳисобдан чиқариш биринчи ярим йилликда тугатилади. Июль ойидан бошлаб эса фуқаро тадбиркорлик фаолиятини тиклаши мумкин.

Тошкент туманлараро иқтисодий суди раиси вазифасини бажарувчи Илҳомжон Ражабовнинг алоҳида таъкидлашича: «… Агарда якка тартибдаги тадбиркорнинг номида ягона турар жойи бўлса ва унда оила аъзолари билан доимий рўйхатда турса, ундирув ушбу мол-мулкка нисбатан қаратилмайди…».

Таҳририятдан: ундирув қандай мол-мулкга нисбатан қаратилмаслиги қуйидагиларда мустаҳкамланган:

• “Суд ҳужжатлари ва бошқа органлар ҳужжатларини ижро этиш тўғрисида”ги Қонуннинг 52-моддасида;

• Қарздор ва унинг оиласининг нормал турмуш кечириши учун зарур бўлган, ижро ҳужжатлари бўйича ундирув қаратилиши мумкин бўлмаган уй анжомлари ва жиҳозлари, кийимлар ҳамда бошқа буюмлар рўйхатида (14.04.2009 йилдаги 110-сон ВМҚ қарорига илова).