ҚҲТБТ порталида Тошкент шаҳар ҳокимининг “Янги тарифлар жорий қилиниши тўғрисида”ги қарори лойиҳаси эълон қилинди.
Лойиҳа Тошкент шаҳрида умумий фойдаланиладиган транспортда йўлкира ҳақини тўлашда транспорт карталаридан фойдаланувчи йўловчилар қамровини ошириш ва табақалашган тарифлар жорий этиш орқали шаҳар йўловчилар транспорти корхоналари молиявий-хўжалик фаолиятининг самарадорлигини ошириш мақсадида ишлаб чиқилган.
2022 йил 1 январдан Тошкент шаҳри ҳудудида йўлкира ҳақини қуйидаги миқдорда белгилашни режалаштиришмоқда:
- бир йўловчи учун – 1 700 сўм;
- бир йўловчининг багажини ташиш бўйича хизмат учун - 3 000 сўм.
Шунингдек, шаҳар йўловчилар транспорти - автобус ва метродан фойдаланишда қатновлар сонига боғлиқ ҳолда карталар учун табақалашган тариф режалари тасдиқланади.
2019 йил 15 августдан бошлаб муниципал, тижорат, шунингдек шаҳар атрофи йўналишларида йўлкира ҳақи қиймати 1 400 сўмни ташкил қилади.
Лойиҳа ўзгартирилиши, унга қўшимча киритилиши ёки рад этилиши мумкин.
Лола Абдуазимова.
