ҚҲТБТ порталида тегишли қонун лойиҳаси эълон қилинди. Ишлаб чиқувчи – Марказий банк.
Эслатиб ўтамиз, истеъмол кредити жисмоний шахсларга уларнинг истеъмол эҳтиёжларини қондириш мақсадида товарлар (ишлар, хизматлар) сотиб олиш учун берилади. Истеъмол кредити икки хил шаклда бўлади:
- молиявий – банк ёки бошқа кредит ташкилоти истеъмолчи сотиб олган товарлар учун ишлаб чиқарувчи ёки сотувчига пул маблағларини ўтказади;
- товар – истеъмолчига сотиб олинган товарлар учун ҳақни бўлиб-бўлиб тўлаш тарзида берилади.
Ишлаб чиқилган ўзгартириш ва қўшимчаларда қуйидагилар назарда тутилган:
а) молиявий истеъмол кредитини бериш қоидалари истеъмолчи учун бажарилган ишлар ҳақини тўлашга татбиқ этилади. Ҳозир у сотиб олган товарлар ва хизматлар ҳақини тўлаш учунгина расмийлаштирилади;
б) истеъмол товарларини (ишларини, хизматларини) ишлаб чиқарувчи корхоналар ёки сотувчи ташкилотлар билан бир қаторда якка тартибдаги тадбиркорлар-ишлаб чиқарувчилар товар истеъмол кредитини тақдим этишлари мумкин. Шунингдек якка тартибдаги тадбиркорлар ишлаб чиқарган товарларни (ишларни, хизматларни) сотиб олиш учун молиявий истеъмол кредитлари берилади;
в) нафақат Ўзбекистонда ишлаб чиқарилган товарларга, балки импорт товарларга ҳам молиявий истеъмол кредитини олиш имкони туғилади.
Лойиҳа ўзгартирилиши, унга қўшимча киритилиши ёки рад этилиши мумкин.
Олег Заманов.
