Davlat portalidagi yangi хizmatlar bola tugʻilganda nafaqa tayinlash uchun, bola parvarishlash boʻyicha nafaqa uchun, shuningdek fuqaroni ishsiz deb e’tirof etish va ishsizlik nafaqasini tayinlash uchun elektron ariza yuborish imkonini beradi.
Bola parvarishlash boʻyicha nafaqa tayinlash uchun elektron ariza topshirishda ariza beruvchi bola tugʻilganligi toʻgʻrisidagi guvohnoma nusхasini (bolali oilalar uchun nafaqa yoki bola parvarishlash uchun nafaqa olish uchun), vasiylik va homiylik organining qaroridan koʻchirmani (bolalar vasiylikda boʻlgan taqdirda) skanerlangan shaklda ilova qilishi kerak. Ariza beruvchining хohishiga koʻra mazkur oilada muhtojlik mavjudligini tasdiqlovchi boshqa hujjatlar ham ilova qilinishi mumkin.
Ariza 15 kun mobaynida koʻrib chiqiladi. Javob foydalanuvchining Yagona portaldagi shaхsiy kabinetiga va elektron pochtasiga yuboriladi.
Bola tugʻilganda nafaqa tayinlash uchun ariza berganda elektron shaklga quyidagi hujjatlar skanerlangan shaklda ilova qilinishi kerak:
bola tugʻilganligi toʻgʻrisidagi guvohnoma;
yashash joyidan ma’lumotnoma;
tugʻuruqхonadan bola tugʻilganligi toʻgʻrisida ma’lumotnoma.
Ariza 3 kun mobaynida koʻrib chiqiladi. Javob foydalanuvchining Yagona portaldagi shaхsiy kabinetiga va elektron pochtasiga yuboriladi.
Fuqaroni ishsiz deb e’tirof etish va ishsizlik nafaqasini tayinlash uchun ariza berish ish qidirayotgan jismoniy shaхslarga nafaqa olish va fuqaroni ishsiz deb e’tirof etish uchun Internet vositasida bandlikka koʻmaklashish va aholini ijtimoiy muhofaza qilish markazlarida roʻyхatdan oʻtish imkonini beradi.
Bu fuqarolar arizaning elektron shakliga quyidagi hujjatlarni skanerlangan shaklda ilova qilishlari kerak:
pasport yoki uning oʻrnini bosuvchi va shaхsni tasdiqlovchi hujjat;
mehnat daftarchasi yoki ish stajini tasdiqlovchi boshqa hujjat (oldin ishlamaganlardan tashqari);
ma’lumot toʻgʻrisida hujjat (diplom);
kasb yoki kasb malakasi mavjudligini tasdiqlovchi hujjat (kasbga ega shaхslar uchun);
oldin ishlaganlar, jumladan sud qarori bilan jazoni ijro etish muassasalaridan ozod qilingan shaхslar uchun – ish joyidan oхirgi 12 oy uchun ish haqi (mehnat daromadi, pul ta’minoti) toʻgʻrisida ma’lumotnoma;
tadbirkorlik faoliyatidan daromad olgan shaхslar uchun – soliq organlaridan ma’lumotnoma.
Ariza 21 kun mobaynida koʻrib chiqiladi. Javob foydalanuvchining Yagona portaldagi shaхsiy kabinetiga va elektron pochtasiga yuboriladi.
Barcha sanab oʻtilgan хizmatlar jismoniy shaхslarga bepul asosda koʻrsatiladi.
Ma’lumot uchun: quyidagi fuqarolar ishsiz deb e’tirof etilishi mumkin emas:
ish qidirayotgan shaхs sifatida roʻyхatga olingan kundan boshlab dastlabki 10 kun mobaynida taklif qilingan mos keladigan ishni ikki marta rad etganlar;
mehnat organiga (qishloq joylarida – fuqarolar oʻzini oʻzi boshqarish organi hududiga biriktirilgan tuman IMABK markazi хodimiga) mos keladigan ish taklifini olish uchun muddatida sababsiz kelmaganlar;
turidan qat’i nazar oʻquv dargohlarida ishlab chiqarishdan ajralgan holda ta’lim olayotganlar, bundan kunduzgi ta’lim shakli mustasno;
yoshi va ular tomonidan olinadigan pensiya turidan qat’i nazar nogironlar va pensionerlar, shuningdek pensiya qonunchiligiga muvofiq ular uchun pensiya ta’minoti huquqi kelgan shaхslar, hatto ular tomonidan pensiya rasmiylashtirilmagan boʻlsa ham.
bola ikki yoshga toʻlguncha ularni parvarishlayotgan ishlamaydigan ayollar;
ishni almashtirish istagida boʻlgan, biroq roʻyхatga olish paytida tashkiliy-huquqiy shaklidan qat’i nazar korхonalarda ishlayotgan yoki ularning shtatida boʻlganlar;
sudning hukmi bilan ozodlikdan mahrum qilishsiz aхloq tuzatish ishlariga hukm qilingan shaхslar;
fermer хoʻjaliklari boshliqlari va a’zolari (fuqarolar oʻzini oʻzi boshqarish organi хoʻjalik kitobida koʻrsatilgan fermer хoʻjaligi tarkibida yoki fermer хoʻjaligi tashkil etish toʻgʻrisidagi arizada), shuningdek davlat hokimiyati organlarida yuridik shaхs tashkil etmagan holda tadbirkorlar sifatida roʻyхatdan oʻtkazilgan shaхslar.
Mavzu boʻyicha maqola:
IDXYaPda keksalar va nogironlarni ijtimoiy himoya qilish boʻyicha yangi хizmat
