Президентнинг 31.03.2022 йилдаги “Муборак Рамазон ойини муносиб тарзда ўтказиш тўғрисида”ги қарори қабул қилинди. Ҳужжат ЎзАда эълон қилинган.
Ўзбекистон мусулмонлари идорасининг ахборотига мувофиқ, муборак Рамазон ойининг бошланиши 2 апрель кунига тўғри келади.
Қорақалпоғистон Вазирлар Кенгаши, вилоятлар ва Тошкент шаҳар ҳокимликларига Дин ишлари бўйича қўмита, Маҳалла ва нуронийларни қўллаб-қувватлаш вазирлиги ҳамда жамоат ташкилотлари билан биргаликда Рамазон ойини миллий анъана ва қадриятларга мос ва муносиб тарзда ўтказишга доир чора-тадбирларни амалга ошириш топширилди.
Муборак Рамазон ойининг мазмун-моҳияти инсонийлик, шукроналик, сабр-қаноат каби фазилатларни эъзозлаш, оилалар ҳамда маҳаллаларда меҳр-оқибат ва ўзаро ҳурмат муҳитини мустаҳкамлаш, эҳтиёжманд кишиларни ҳар томонлама қўллаб-қувватлашдан иборатдир.
Лола Абдуазимова.
