Президент томонидан 30.04.2025 йилдаги «Бозор ислоҳотлари ва Ўзбекистоннинг Жаҳон савдо ташкилотига аъзолигига эришиш янада жадаллаштирилиши муносабати билан Ўзбекистон Республикаси Президентининг айрим ҳужжатларига ўзгартириш ва қўшимчалар киритиш тўғрисида»ги ПФ-74-сон Фармон имзоланди.
Айрим давлат корхоналарининг эксклюзив ҳуқуқлари бекор қилинмоқда. Хусусан:
«Ўзкимёсаноат» АЖ ташкилотларининг кимёвий маҳсулотлари экспорти «Ўзкимёимпэкс» МЧЖ орқали амалга оширилишини;
«Ўзкимёсаноат» АЖ ташкилотларининг ишлаб чиқариш эҳтиёжлари учун ускуналар, эҳтиёт қисмлар, бутловчи буюмлар, хомашё ва материаллар импорти уларнинг буюртмалари бўйича «Ўзкимёимпэкс» МЧЖ томонидан амалга оширилаишини белгиловчи нормалар бекор қилинмоқда.
Шуниндек, ўзлари ишлаб чиқарган товарларни, шу жумладан, хорижий валютага марказлаштирилмаган тарзда етказиб берувчи экспортчи корхоналар учун қонунчиликда назарда тутилган солиқ имтиёзлари ва преференцияларни «Ўзкимёимпэкс» МЧЖ ва унинг ишлаб чиқарувчи ташкилотларига жорий этиш ҳақидаги норма бекор қилинмоқда.
«UzGasTrade» АЖ томонидан табиий газни импорт қилиш тендер, танлов ҳамда Ҳукумат қарори асосида тўғридан-тўғри музокаралар натижаларига кўра амалга оширилишини белгиловчи норма бекор қилинмоқда.
Илгари электротехника маҳсулотларининг давлат харидлари доирасида чет эллик етказиб берувчилар билан бир қаторда маҳаллий ишлаб чиқарувчилар иштирок этганда уларга нисбатан импорт товарларининг DDP (Ўзбекистон) нархидан нарх преференцияси берилган эди. Аниқлик киритилишича, корпоратив буюртмачилар томонидан тижорат мақсадларида қайта сотиш ёки шу мақсадларда товарлардан ишлаб чиқаришда фойдаланиш учун амалга ошириладиган давлат харидларида преференциялар қўлланмайди.
Ҳужжат Қонунчилик маълумотлари миллий базасида эълон қилинган ва 03.05.2025 йилдан кучга кирган.
Собир Нурбердиев
