Президент томонидан 27.05.2025 йилдаги «Мебель ва ёғочсозлик саноатининг ривожланиши учун қулай шарт-шароитлар яратишга оид қўшимча чора-тадбирлар тўғрисида»ги ПҚ-193-сон қарор имзоланди.
2029 йил 1 январга қадар мебель ишлаб чиқаришда фойдаланиладиган айрим хомашё, фурнитура ва аксессуарлар импортида божхона божи 1 фоиз миқдоридаги ставкада қўлланилади (тўлиқ рўйхат – бу ерда).
2025 йил 1 июлдан бошлаб ўз уйларида фаолият юритаётган якка тартибдаги тадбиркорлар мебель маҳсулотлари ишлаб чиқариши билан шуғулланиши мумкин бўлади.
Тадбиркорлик субъектларининг ариза-талаблари бўйича касбий кўникмалар марказларида мебель ва ёғочсозлик саноати йўналишида қисқа муддатли малакавий тайёрлов курслари (шу жумладан, дуал таълим асосида) ташкил этилади. Бунда ўқитиш харажатларининг 60 фоизи Савдога кўмаклашиш жамғармаси маблағлари ҳисобидан қопланади.
2025 йил 1 октябрдан бошлаб электрон кооперация портали ва давлат харидлари электрон тизимлари операторларининг «Миллий дўкон» саҳифаларида фақатгина маҳаллий ишлаб чиқарилган товар тўғрисидаги сертификатга эга бўлган мебель маҳсулотларини жойлаштириш ва мазкур сертификатга эга тадбиркорлик субъектларининг савдоларда иштирок этишига рухсат берилади.
Ҳужжат Қонун ҳужжатлари маълумотлари миллий базасида эълон қилинган ва 29.05.2025 йилдан кучга кирди.
Собир Нурбердиев
