Истиқболли лойиҳалар миллий агентлиги директорининг буйруқлари билан (07.07.2025 й. АВ рўйхат рақами 3640 ва 3641-сон) билан Интернетда таваккалчиликка асосланган ўйинларни ташкил этиш ва ўтказиш тартиби ҳамда букмекерлик фаолияти тўғрисидаги низомлар тасдиқланди.
Ҳужжатлар билан Интернет тармоғида таваккалчиликка асосланган ўйинлар ва букмекерлик фаолиятини ташкил этиш, ўтказиш ва амалга ошириш тартиби белгиланди.
Хусусан, ўйин ташкилотчиларига қуйидаги мажбуриятлар юкланади:
- электрон платформаларнинг зарур даражада ишлашини ва киберхавфсизлигини таъминлаш, шунингдек, электрон платформаларга рухсатсиз киришни ҳимоя қилиш ва олдини олиш чора-тадбирларига риоя қилиш;
- Ўйинчилар мажбурий рақамли (масофавий) идентификациядан ўтгандан сўнг ўйинга қўйилиши;
- қонун ҳужжатларида назарда тутилган реклама талабларига риоя этилишини таъминлаш.
Ўйин ташкилотчиларига қуйидагилар тақиқланади:
- вояга етмаганларга ўз хизматларини кўрсатиш;
- таваккалчиликка асосланган ўйинларга қарам бўлган шахслар, шунингдек, таваккалчиликка асосланган ўйинларда иштирок этиши тақиқланган Ўзбекистон фуқаролари ва чет эл фуқаролари тоифалари рўйхатига киритилган шахслар билан муносабат ўрнатиш;
- қонунчилик талабларига жавоб бермайдиган ўйин қурилмалари, дастурий таъминот ёки бошқа қурилмалардан фойдаланган ҳолда ўз фаолиятини ташкил этиш, юритиш ёки амалга ошириш;
- лицензияда кўрсатилмаган домен номи орқали ўз хизматларини кўрсатиш;
- кредит, бўлиб-бўлиб тўлаш ва (ёки) қарз маблағларидан, шу жумладан учинчи шахсларнинг маблағларидан фойдаланган ҳолда ставкаларни таклиф қилиш ва (ёки) қабул қилиш;
- омонатларни қабул қилиш, ставкаларни ташкил этиш ва ютуқларни тўлашда нақд пул маблағларидан фойдаланиш.
Шунингдек, ўйинлар ва гаровларга қўйиладиган тегишли талаблар, масъулиятли ўйин тамойилини амалга ошириш бўйича вазифалар, ташкилотчиларнинг электрон платформаларига жойлаштириладиган маълумотларга қўйиладиган талаблар белгиланди.
Шунингдек, Интернет бутунжаҳон ахборот тармоғида таваккалчиликка асосланган ўйинлар, лотереялар ва букмекерлик фаолиятини ташкил этувчиларга, шунингдек, Ўзбекистон Республикаси резидентларига лотереялар ва таваккалчиликка асосланган ўйинларни ташкил этиш ва ўтказиш соҳасида ноқонуний хизматлар кўрсатувчи чет эл юридик шахсларига нисбатан жарималар қўллаш тартиби тасдиқланди (07.07.2025 й. АВ рўйхат рақами 3643-сон).
Ҳужжат билан жарималарни қўллаш асослари ва тартиби, шунингдек, ушбу масала бўйича қарорлар устидан шикоят қилиш тартиби белгиланди, ҳуқуқбузарликларнинг турлари ва қўлланиладиган жарималар миқдори тасдиқланди.
Лотереялар ва таваккалчиликка асосланган бошқа ўйинларни тартибга солиш учун бир қатор НҲҲларнинг қабул қилиниши, аввало, истеъмолчилар ва аҳолининг заиф қатламларини ҳимоя қилишга, хусусан, вояга етмаганлар, ушбу турдаги ўйинларга қарам бўлган ва чекловлар рўйхатига киритилган шахсларни ушбу ўйинларга киритмаслик, шунингдек, жиноятчилик даражасини камайтиришга қаратилган.
Ҳужжатлар Қонун ҳужжатлари маълумотлари миллий базасида эълон қилинган ва 08.07.2025 йилдан кучга кирди.
Лола Абдуазимова
