Вазирлар Маҳкамасининг 26.07.2025 йилдаги “Ер қаъри давлат фонди маълумотларини юритиш тартибини такомиллаштириш тўғрисида”ги 467-сонли қарори қабул қилинди.
Ҳужжат геологик ўрганиш ва давлат мониторинги соҳасида шаффофлик ва самарадорликни ошириш мақсадида рақамли инструментлар ва ягона ҳисоб юритиш тартибларини жорий этиш мақсадида қабул қилинди.
Қарорга мувофиқ:
- Ер қаъридан фойдаланиш маълумотларини юритиш Тоғ-кон саноати ва геология вазирлиги ҳузуридаги Ер каъридан фойдаланиш маркази томонидан амалга оширилади;
- Ер қаъри бойликлари тўғрисидаги маълумотларга геологик ахборот, кадастр ва ўрганиш натижалари киради.
Барча маълумотлар “Геомониторинг” ахборот тизимига киритилади, у идоралараро интеграция ва реал вақт режимида маълумот алмашишни таъминлайди.
Шунингдек, қуйидагилар белгиланди:
- Давлат ва хусусий секторлар геологик ишларини “Геомониторинг” орқали рўйхатдан ўтказишлари шарт;
- Тадқиқот параметрлари, участкалар ёки ташкилотларда ўзгариш юз берса, қайта рўйхатдан ўтказиш талаб этилади.
Ер қаъридан фойдаланиш учун лицензияси мавжуд фойдаланувчилар учун қўшимча геологик тадқиқотларни рўйхатдан ўтказиш тартиби соддалаштирилган.
Қарор билан қуйидагилар тасдиқланди:
- Ер қаъри давлат фонди кадастрини юритиш тартиби тўғрисидаги низом;
- Ер қаърини геологик жиҳатдан ўрганиш бўйича ишларни давлат ҳисобига олиш тартиби тўғрисидаги низом;
- Ер қаъри маълумотларини “Геомониторинг” орқали солиқ тизими билан интеграция қилиш;
- Геологик ишлар рўйхатдан ўтказилиши, қайта рўйхатдан ўтказилиши ва тўхтатилиши онлайн режимда амалга оширилиши тартиби.
Ҳужжат Қонун ҳужжатлари маълумотлари миллий базасида давлат тилида эълон қилинган ва 28.07.2025 йилдан кучга кирди.
Саодат Усмонова
