23.10.2025 йилдаги ЎРҚ-1090-сон Қонун билан айрим қонун ҳужжатларига ўзгартиш ва қўшимчалар киритилди.
Ҳужжат махсус юклар ва ҳарбий тузилмаларнинг Ўзбекистон ҳудуди орқали транзитига рухсатномалар бериш тартибини соддалаштириш, шунингдек, иқлим ўзгариши билан боғлиқ табиий офатлар хавфини камайтириш ва фавқулодда вазиятлар оқибатида етказилган зарарни баҳолаш механизмини аниқ белгилашга қаратилган.
Хусусан, "Махсус юклар ва ҳарбий таркибларнинг транзити тўғрисида"ги Қонунга ўзгартишлар киритилмоқда. Улар махсус юклар ва ҳарбий тузилмалар транзитига рухсатнома бериш тўғрисида қарор қабул қилиш муддатини ариза тушган кундан бошлаб 30 кундан 20 кунгача қисқартиришни назарда тутади. Қўшимча текширув ўтказиш, қўшимча ҳужжатларни тақдим этиш зарур бўлган тақдирда ушбу муддат 10 кунгача узайтирилиши мумкин. Транзит рухсатномасининг амал қилиш муддати 30 кундан 90 кунгача узайтирилмоқда.
Қонун билан "Аҳолини ва ҳудудларни табиий ҳамда техноген хусусиятли фавқулодда вазиятлардан муҳофаза қилиш тўғрисида"ги Қонунга ҳам ўзгартиш ва қўшимчалар киритилмоқда. Улар қуйидагиларга ваколатли бўлган республика ва маҳаллий ижро этувчи ҳокимият органларининг вазифаларини белгилайди:
- фавқулодда вазиятларнинг олдини олиш ва уларни бартараф этиш;
- аҳоли ва ҳудудларни табиий ва техноген хусусиятли фавқулодда вазиятлардан ҳамда иқлим ўзгариши билан боғлиқ табиий офатлардан муҳофаза қилиш;
- фавқулодда вазиятлар натижасида етказилган зарарни баҳолаш.
Ҳужжат Қонун ҳужжатлари маълумотлари миллий базасида эълон қилинган ва 23.10.2025 йилдан кучга кирди.
Лола Абдуазимова
