Вазирлар Маҳкамасининг 24.10.2025 йилдаги 678-сон қарори билан "O'zbekiston qayta sug'urta kompaniyasi" миллий суғурта компанияси фаолиятини ташкил этиш чора-тадбирлари белгиланди.
Унинг АЖ шаклида ташкил этилиши Президентнинг 23.05.2025 йилдаги ПҚ-191-сон қарорида назарда тутилган. Компания фаолиятининг асосий йўналишлари:
- қайта суғуртанинг барча турларини амалга ошириш;
- республика иқтисодиётига хорижий ва маҳаллий инвесторларнинг инвестиция лойиҳаларини амалга оширишда тўғридан-тўғри ва портфель инвестициялар, таваккалчиликларнинг комплекс қайта суғурта ҳимоясини таъминлаш;
- қайта суғурталаш операцияларини ўтказиш масалалари бўйича хорижий мамлакатларнинг суғурта ва қайта суғурталаш компаниялари билан ҳамкорлик қилиш.
Компаниянинг устав капитали 300 млрд сўмдан кам бўлмаган миқдорда шакллантирилади, шундан 50 фоизи давлат улуши, 50 фоизи хусусий инвесторлар улуши ҳисобланади.
Истиқболли лойиҳалар миллий агентлиги Компанияда давлат улуши бўйича акциядор вазифасини бажаради.
Агентлик ўз маблағлари ҳисобидан ташкил этилгандан кейин бир ой муддатда устав капиталидаги давлат улушининг 5 фоизини, қолган қисмини – бир йил давомида ҳар чоракда тенг улушларда киритади.
Компанияга қуйидагиларга рухсат берилади:
- хорижий банкларда белгиланган тартибда жорий ҳисобварақлар очиш ва банк омонатлари бўйича тўловларни амалга ошириш, улар бўйича операциялар ўтказиш, суғурта тўловларини амалга ошириш, суғурта ва инвестиция фаолияти билан боғлиқ бошқа операцияларни бажариш;
- АЖнинг ички ҳужжатларида белгиланган талабларга мувофиқ ўзига тегишли улуш миқдоридан ортиқ мажбуриятларни қабул қилиш;
- фаолият учун зарур бўлган асбоб-ускуналар, техника, алоқа воситалари, шунингдек ахборот тизимлари ва асбоб-ускуналарни ишлаб чиқарувчилар ва етказиб берувчиларнинг энг яхши таклифларини танлаб олиш асосида, харид қилиш тартиб-таомилларини электрон шаклда ўтказмасдан харид қилиш.
Шунингдек, истисно тариқасида 2031 йил 1 январга қадар Жамият акцияларининг давлат улуши бўйича дивидендлари Агентликка тўлиқ ҳажмда ўтказиб берилиши белгиланди.
Ҳужжат Қонун ҳужжатлари маълумотлари миллий базасида эълон қилинган ва 27.10.2025 йилдан кучга кирди.
Лола Абдуазимова
