Президентнинг 30.10.2025 йилдаги ПФ-201-сон Фармони билан ягона ва комплекс стратегик режалаштириш ва ривожланиш тизимини жорий этиш бўйича ташкилий чора-тадбирлар ва белгиланган.
2025 йил 1 ноябрдан бошлаб мақсад -ҳаракат -натижа" занжири асосида стратегик аҳамиятга эга ҳужжатларни ишлаб чиқиш, амалга ошириш, мониторинг қилиш ва баҳолашни ўз ичига олган стратегик режалаштириш ва ривожлантириш тизими жорий этилади.
Вазифалар:
- стратегик режалаштириш ва ривожланиш ҳужжатларининг ягона иерархияси ва ўзаро мувофиқлигини таъминлаш;
- стратегик режалаштириш ва ривожланиш соҳасида вазирликлар, идоралар ва маҳаллий ижро этувчи ҳокимият органларининг ўзаро ҳамкорлиги тартиби, ваколатлари, функционал вазифалари ва жавобгарлик чегараларини белгилаш;
- чуқур илмий тадқиқотлар, шунингдек тенденциялар ва прогнозларни холисона таҳлил қилиш асосида давлат сиёсатининг стратегик устувор йўналишларини шакллантириш ва амалга ошириш;
- аниқ, шаффоф ва ўлчанадиган кўрсаткичларга асосланган стратегик мақсадларга эришиш самарадорлигини мониторинг қилиш ва баҳолаш тизимини жорий этиш;
- соҳалар, тармоқлар ва ҳудудларни ривожлантириш учун янги ёндашувларни жорий этиш, ишларни замонавий форматлар ва инновацион усуллар асосида ташкил этиш;
- стратегик таҳлил ва режалаштириш соҳасида юқори малакали кадрларнинг янги авлодини тайёрлашнинг интеграциялашган тизимини яратиш.
Стратегик режалаштириш ҳужжатлари иерархияси
Биринчи даражали стратегик режалаштириш ҳужжатлари концепция шаклида қабул қилинади, 7 йилдан ортиқ муддатга ишлаб чиқилади ва одатда қонунлар билан тасдиқланади.
Иккинчи даражали стратегик режалаштириш ҳужжатлари стратегиялар шаклида қабул қилинади, 4 йилдан 7 йилгача муддатга ишлаб чиқилади ва Президент ҳужжатлари билан тасдиқланади.
Учинчи даражали стратегик режалаштириш ҳужжатлари дастурлар ("йўл хариталари," чора-тадбирлар режалари) шаклида қабул қилинади, 1 йилдан 3 йилгача бўлган муддатга ишлаб чиқилади ва Вазирлар Маҳкамасининг қарорлари билан тасдиқланади.
Стратегик режалаштириш ва ривожлантириш тизимини жорий этишга қаратилган биринчи навбатдаги чора-тадбирларни амалга ошириш бўйича "Йўл харитаси" тасдиқланди.
Стратегик режалаштириш ва ривожлантириш тизимини мувофиқлаштириш
Таҳлилий ва тадқиқот тузилмалари фаолиятини ташкил этиш бўйича мувофиқлаштирувчи кенгаш Президент ҳузуридаги Стратегик режалаштириш ва ривожлантириш бўйича мувофиқлаштирувчи кенгаш, Стратегик ислоҳотлар агентлиги Президент ҳузуридаги Стратегик ривожланиш ва ислоҳотлар агентлиги этиб қайта ташкил этилади.
Мувофиқлаштирувчи кенгашга қуйидаги қўшимча вазифалар юклатилди:
- долзарб муаммоларни таҳлил қилиш, мамлакатни стратегик ривожлантириш бўйича ғоя ва ташаббусларни шакллантириш;
- стратегик ташаббусларни ишлаб чиқиш ва экспертизадан ўтказишни "Ўзбекистон - 2030" стратегияси, концепциялар, стратегиялар ва дастурларга мувофиқлигини таъминлаш нуқтаи назаридан мувофиқлаштириш;
- концепциялар, стратегиялар ва дастурларнинг ("йўл хариталари," чора-тадбирлар режалари) "Ўзбекистон - 2030" стратегияси мақсадлари билан тўлиқ ўзаро боғлиқлиги ва уйғунлигини таъминлаш, шунингдек, уларнинг амалга оширилиши самарадорлигини мониторинг қилиш ва баҳолаш;
- жамият ва давлат ҳаётининг турли соҳалари кесимида мамлакат ривожланишини узоқ муддатли режалаштириш бўйича фаолиятни ташкил этиш.
Мувофиқлаштирувчи кенгаш стратегик режалаштириш ва ривожлантириш соҳасида идоралараро коллегиал орган ҳисобланади.
Агентлик стратегик режалаштириш ва ривожлантириш тизимини ташкил этишни тартибга солиш бўйича ваколатли давлат органи, шунингдек Мувофиқлаштирувчи кенгашнинг ишчи органи ҳисобланади.
Президент ҳузуридаги Қонунчилик ва ҳуқуқий сиёсат институтига қуйидаги қўшимча вазифалар юклатилди:
- стратегик режалаштириш ва ривожлантиришнинг илмий-услубий ва сиёсий-ҳуқуқий асосларини ишлаб чиқиш ва такомиллаштириш;
- илмий ва таҳлилий тадқиқотларни мувофиқлаштириш;
- стратегик режалаштириш ва ривожлантиришнинг сиёсий-ҳуқуқий асослари соҳасида юқори малакали мутахассис-таҳлилчиларни тайёрлаш.
Ҳужжат Қонун ҳужжатлари маълумотлари миллий базасида эълон қилинган ва 01.11.2025 йилдан кучга кирди.
Лола Абдуазимова
