Марказий банк Бошқарувининг қарори (11.11.2025 й. АВ рўйхат рақами 3294-3-сон) билан Ўзбекистон Республикаси ҳудудида банк карталарининг чиқарилиши ва муомалада бўлиши қоидалари тўғрисидаги низомга ўзгартириш ва қўшимчалар киритилди.
Ҳужжат билан карталарнинг иккита янги тури жорий этилмоқда:
- эҳтиёжманд фуқароларга нафақа ва моддий ёрдамни ўтказиш учун мўлжалланган ижтимоий карталар;
- бизнес-карталар – якка тартибдаги тадбиркорлар ва ўзини ўзи банд қилган шахсларга тўловларни қабул қилиш учун берилади.
Эндиликда 14 ёшдан 18 ёшгача бўлган вояга етмаган шахслар тижорат банкларида мустақил равишда, 14 ёшгача бўлган вояга етмаган шахслар эса – ота-онасидан бирининг ёки қонуний вакилининг ёзма розилиги асосида банк картасини очишлари мумкин.
Шунингдек, янгиланган қоидалар фойдаланувчини идентификация қилган ҳолда олдиндан эмиссия қилинадиган шахсий банк карталарини мобиль иловалар орқали чиқариш ва уларни активация қилиш тартибини назарда тутади.
Бундан ташқари, мазкур ҳужжат билан юридик шахслар учун ичимлик ва оқова сув хизматлари учун тўловларни корпоратив банк карталари орқали амалга ошириш имконияти яратилди.
Ҳужжат Қонун ҳужжатлари маълумотлари миллий базасида эълон қилинган ва 12.11.2025 йилдан кучга кирди.
Лола Абдуазимова
