Президентнинг 24.11.2025 йилдаги "Тошкент шаҳрида экологик вазиятни яхшилаш бўйича кечиктириб бўлмайдиган чора-тадбирлар тўғрисида"ги ПФ-229-сон Фармони қабул қилинди.
Шаҳарда атроф-муҳит ҳолатини яхшилаш бўйича шошилинч чора-тадбирларни амалга оширадиган махсус комиссия тузилди. Унинг асосий вазифалари:
• Тошкент шаҳридаги экологик вазиятни доимий таҳлил ва мониторинг қилиш, унинг ёмонлашиш тенденцияларини прогноз қилиш;
• давлат органлари, шу жумладан ҳуқуқни муҳофаза қилувчи ва назорат қилувчи органларнинг экологик вазиятни барқарорлаштириш бўйича ҳаракатларини мувофиқлаштириш, улар ўртасида зарур ҳамкорлик ва ахборот алмашинувини ташкил этиш;
• экологик муаммолар бўйича илмий тадқиқотларни мувофиқлаштириш, уларнинг олдини олишнинг замонавий ва самарали усулларини, шу жумладан халқаро тажрибани ўрганиш ҳамда хорижий ва маҳаллий олимлар ва мутахассисларни жалб қилиш асосида ишлаб чиқиш ва жорий этиш;
• Тошкент шаҳрида экологик вазият ёмонлашган тақдирда, унинг оқибатларини юмшатиш бўйича аниқ чора-тадбирларни, шу жумладан молиялаштириш манбаларини, шу жумладан мамлакатнинг экологик муаммоларини бартараф этиш бўйича Давлат мақсадли жамғармаси ҳисобидан аниқлаш;
• оммавий ахборот воситаларини жалб қилган ҳолда мавжуд экологик вазият, унинг аҳоли саломатлигига таъсири ва олдини олиш усуллари тўғрисида тушунтириш ишларини самарали ташкил этиш.
Махсус комиссияга қуйидаги ваколатлар берилади:
- табиий чанг кўпайган даврда саноат корхоналари, транспорт, иссиқлик таъминоти ва бошқа тармоқлар фаолиятига чекловлар жорий этиш;
- транспорт воситалари ҳаракатини чеклаш, шу жумладан:
- Тошкент шаҳри бўйлаб юк ташувчи транспорт воситаларининг ҳаракатланишига вақтинчалик чеклов жорий этиш;
- транспорт воситаларининг, шу жумладан тоқ ва жуфт кунларда ҳаракатланишини чеклаш (электромобиллардан ташқари);
- ҳаракат вақтинча чекланадиган кўчалар ва бошқа ҳудудларни аниқлаш;
- атмосфера ҳавоси сифатига салбий таъсир кўрсатувчи моддалар чиқарадиган иссиқхоналар ва бошқа объектлар фаолиятини вақтинча ёки бутунлай тўхтатиб қўйиш;
- Тошкент шаҳридан бошқа ҳудудларга мажбурий кўчириладиган саноат корхоналари ва зоналарини белгилаш;
- саноат корхоналари учун йўл қўйиладиган чиқиндилар ҳажмини белгилаш ва ушбу талабни бузган саноат корхоналари фаолиятини тўхтатиш бўйича белгиланган тартибда чоралар кўриш;
- қурилиш ишларини бажаришда чекловлар ва талабларни, шу жумладан қурилишда чангни бостириш ускуналарини ўрнатиш ва бошқа талабларни белгилаш;
- қирғоқбўйи, сувни муҳофаза қилиш зоналарида сув объектлари қурилишини келишиш.
Соғлиқни сақлаш вазирлиги Экология қўмитаси билан биргаликда 2025 йил 1 декабрга қадар:
• Жаҳон соғлиқни сақлаш ташкилоти тавсиялари асосида ҳаво сифати кўрсаткичларининг миллий тавсиявий индексациясини ишлаб чиқиш (яшил, сариқ, қизил, жигарранг);
• тавсия этилган индексация асосида ифлосланган ҳавонинг инсон организмига таъсирини камайтириш бўйича тавсиялар ишлаб чиқиш;
• ҳаво сифати кескин ёмонлашган ҳолатларда санитария хизмати органлари томонидан аҳолини барвақт огоҳлантириш тизимини жорий этиш.
Ҳужжат Қонун ҳужжатлари маълумотлари миллий базасида эълон қилинган ва 25.11.2025 йилдан кучга кирди.
Лола Абдуазимова
