Президентимизнинг 01.12.2025 йил 1 декабрдаги ПҚ-365-сон қарори билан қурилиш материаллари саноатини ривожлантириш чора-тадбирлари белгиланган.
Асосий вазифалар:
- ишлаб чиқариш ҳажмини 62 триллион сўмга, экспорт ҳажмини 1,5 миллиард долларга етказиш;
- экологик тоза, ресурстежамкор ва энергосамарадор қурилиш материаллари ишлаб чиқариш;
- қурилиш материалларини ишлаб чиқариш жараёнларининг илмий тадқиқотлар билан интеграциясини таъминлаш;
- қурилиш материаллари хавфсизлиги назоратини кучайтириш.
Икки ҳафта муддатда 2028 йил 1 январга қадар импорт қилишда божхона божидан озод қилинадиган қурилиш материаллари ишлаб чиқариш учун зарур хомашё ва материаллар рўйхати тасдиқлансин. Шунингдек, қурилиш материаллари ишлаб чиқаришни ташкил этиш бўйича қиймати 3,5 миллиард долларлик инвестиция лойиҳаларининг мажмуавий параметрлари ишлаб чиқилмоқда.
"Қурилиш материаллари саноати корхоналарида сунъий интеллект ва рақамлаштиришни қўллаб-қувватлаш компанияси"ни юридик субъект мақомида ташкил этиш режалаштирилган.
Давлат бюджети параметрларида ҳар йили 100 миллиард сўм СИ технологиялари, рақамлаштириш ва автоматлаштириш тизимларини корхоналар фаолиятига жорий этиш, илмий салоҳиятни ошириш, шунингдек, энергия аудитини ўтказиш харажатларини қоплаш учун ажратиб борилади.
2026 йил 1 июлдан лойиҳа-смета ҳужжатларини шаҳарсозлик экспертизасидан ўтказишда камида 25 фоиз ҳажмда экологик тоза, ресурс тежамкор ва энергия самарадор қурилиш материалларини тайёрлаш талаблари жорий этилади.
Шу билан бирга, бино ва иншоотларни барпо этишда маҳаллий қурилиш материаллари улуши камида 80 фоиз бўлиши мажбурийлиги белгиланмоқда.
Инновацион ривожланиш агентлиги 2026 йил 1 январдан бошлаб қурилиш материаллари соҳасида фаолият юритаётган ёш олимлар учун хорижий илмий стажировкаларга танлов эълон қилади.
Бундан ташқари, Ўзбекистон стандартлар институтида қурилиш материаллари саноати ходимларининг малакасини ошириш бўйича уч йиллик дастурни тасдиқлаш режалаштирилган.
2026 йил 1 мартдан бошлаб "Техник жиҳатдан тартибга солиш" ва "Шаффоф қурилиш" ахборот тизимларини ўзаро интеграция қилиш доирасида маҳсулоти хавфсизликка мос эмас деб топилган қурилиш материаллари ишлаб чиқарувчи ва етказиб берувчиларнинг электрон реестри жорий этилади.
Шунингдек, хавфли қурилиш материалларини ишлаб чиқарувчи ва етказувчилар рўйхатини эълон қилиш амалиёти жорий этилади.
Ҳужжат Қонун ҳужжатлари маълумотлари миллий базасида эълон қилинган ва 02.12.2025 йилдан кучга кирди.
Лола Абдуазимова
