Адлия вазирининг буйруғи билан Нотариал ҳаракатларни видеоконференсалоқа воситасида амалга ошириш тартиби тўғрисидаги низом тасдиқланди. (05.01.2026 й. АВ рўйхат рақами 3742-сон).
Ҳужжат билан нотариал ҳаракатларни нотариал идорада жисмоний шахснинг ёки юридик шахс вакилининг иштирокисиз видеоконференсалоқа воситасида масофадан туриб амалга ошириш тартиби белгиланди.
Низом талаблари нотариусга, унинг ёрдамчисига, стажёрга, котибга ва нотариал ҳаракатни амалга ошириш вақтида унинг иштирокчиларига нисбатан татбиқ этилади. Бунда улар нотариал ҳужжатнинг тарафи (тарафлари) тўғрисида ўзларига маълум бўлган ахборотнинг махфийлигини таъминлашлари керак.
Нотариал ҳаракатлар видеоконференсалоқа режимида "E-notarius.uz" ахборот портали ва "Notarius" автоматлаштирилган ахборот тизими орқали тасдиқланади.
Нотариал ҳаракатларни видеоконференсалоқа режимида амалга ошириш учун ариза берувчи ўз шахсини тасдиқлаган ҳолда порталда рўйхатдан ўтади. Ариза тизимда танланган нотариус профилига юборилади.
Нотариус аризани келиб тушган кундан эътиборан бир иш куни ичида кўриб чиқади ва аризачининг аризасида камчиликлар мавжудлиги ёки мавжуд эмаслиги тўғрисида унга электрон тармоқ орқали хабарнома юборади. Билдиришнома ариза берувчининг телефон рақамига ҳам юборилиши мумкин.
Нотариал ҳаракатни амалга ошириш муддати ариза берувчига тўлов квитанциялари юборилган санадан эътиборан кўпи билан уч иш куни ичида белгиланади.
Низомда нотариал ҳаракат тарафларининг шахсини, битимнинг хусусиятини ва ҳуқуқий лаёқатини аниқлаш ҳамда маълумотларни тизимга киритиш ҳам назарда тутилган.
Нотариус билан юзма-юз суҳбат чоғида нотариал ҳаракат тарафлари турган жойда бошқа шахслар бўлмаслиги, атроф-муҳит сокин ва етарли даражада ёритилган, видеотасвир аниқ бўлиши лозим.
Нотариал ҳаракатнинг лойиҳаси имзолашга тайёр бўлганидан кейин нотариус тарафларга уларнинг ҳуқуқ ва мажбуриятларини, тузилаётган нотариал ҳаракатнинг мазмуни ва оқибатларини тушунтиради.
Ҳужжат Қонун ҳужжатлари маълумотлари миллий базасида эълон қилинган ва 08.01.2026 йилдан кучга кирди.
Лола Абдуазимова
