Соғлиқни сақлаш вазирининг буйруғи билан Тиббий асбоб-ускуналарнинг клиник тадқиқотларини ўтказиш тартиби тўғрисидаги низом тасдиқланди. (07.01.2026 й. АВ рўйхат рақами 3746-сон).
Ҳужжатга кўра, қуйидаги турдаги тиббий асбоб-ускуналар клиник тадқиқотлар ўтказилмасдан давлат рўйхатидан ўтказилади:
- хавфсизлик таснифи бўйича I синфга мансуб;
- ЖССТ томонидан малакаланган (prequalification) ёки ЖССТ кўмагида рўйхатга олинган "in vitro" ташхиси учун;
- клиник тадқиқотлари илгари Ўзбекистонда ўтказилган.
Клиник тадқиқотларни ўтказиш тўғрисидаги қарор Фармацевтика маҳсулотлари хавфсизлиги марказининг тавсияси асосида Соғлиқни сақлаш вазирлигининг Эксперт кенгаши томонидан қабул қилинади. Улар тиббий асбоб-ускуналарнинг хавфсизлик даражасига қараб камида 20 та клиник тадқиқот субъектларини жалб қилган ҳолда ўтказилади.
Тиббиёт буюмларини давлат рўйхатидан ўтказиш тартиби тўғрисидаги низомга мувофиқ (24.11.2025 й. 738-сон ВМҚ) тиббий буюмни бирламчи текшириш бўйича ижобий хулоса олингандан сўнг бир вақтнинг ўзида лаборатория текширувлари ва тиббий буюмнинг ихтисослаштирилган экспертизаси ўтказилади.
Мустақил эксперт томонидан ихтисослаштирилган экспертиза жараёнида қуйидагилар текширилади:
- клиник тадқиқот ўтказиладиган клиник база, клиник тадқиқот режасининг тўғри танланганлиги;
- текширилаётган тиббий буюмнинг самарадорлиги ва хавфсизлигини ўрганишда замонавий илғор назорат усулларини танлаш.
Ҳужжат Қонун ҳужжатлари маълумотлари миллий базасида эълон қилинган ва 26.02.2026 йилдан кучга киради.
Лола Абдуазимова
