Ўзбекистон Республикаси Президенти Администрацияси ҳузуридаги Оммавий ахборот воситалари учун контент тайёрлаш маркази директорининг буйруғи (22.01.2026 й. АВ рўйхат рақами 3760-сон) билан давлат органлари ва ташкилотлари ахборот хизматлари раҳбарларини аттестациядан ўтказиш ҳамда уларнинг фаолият самарадорлигини баҳолаш тартиби тасдиқланди.
Республика ва маҳаллий ижро этувчи ҳокимият органлари, давлат улуши 50 фоиздан ортиқ бўлган бошқа давлат органлари ва ташкилотларининг ахборот хизматлари раҳбарлари аттестациядан ўтказилади.
Талабгорни аттестациядан ўтказиш унинг касбга яроқлилик даражасини холисона баҳолаш, малака талабларига мувофиқлигини аниқлаш ҳамда унга юкланган вазифалар ва функцияларни бажаришда масъулиятини ошириш мақсадида уч йилда бир марта ўтказилади.
Марказ директори Марказ мутахассислари, шунингдек давлат органлари ва ташкилотлари, илмий ва олий таълим муассасалари вакилларидан иборат таркибда камида етти кишидан иборат Аттестация комиссиясини тузади.
Комиссия ариза берувчининг сўровномаси топширилган кундан бошлаб 10 кун ичида ҳужжатларни батафсил ўрганиб чиқади ва икки ой ичида сертификатлаштиришни амалга оширади.
Аттестация 5 та саволдан иборат оғзаки суҳбат ва амалий тестлар (касбий фаолиятга, шу жумладан ахборот хизматлари соҳасига оид қонун ҳужжатлари масалалари бўйича) шаклида ўтказилади.
Аттестация жараёнининг шаффофлиги ва холислигини таъминлаш учун барча жараёнлар узлуксиз равишда видеотасвирга (овозли) туширилиши ва видеоматериаллар Марказда уч йил давомида сақланиши лозим.
Аттестация давомида суҳбат натижалари комиссиянинг ҳар бир аъзоси томонидан 5 баллик тизимда баҳоланади.
Суҳбат натижаларига кўра камида 4 балл тўплаган номзод аттестациядан ўтган ҳисобланади ва уч йил давомида амал қиладиган сертификатга эга бўлади.
Ариза берувчи аттестациядан ўтмаган тақдирда, давлат органи ёки ташкилоти ушбу ходимни аттестациядан ўтказиш санасидан кейин уч ойдан кечиктирмай, лекин олти ойдан кечиктирмай қайта аттестациядан ўтказиш учун ариза бериши мумкин.
Ҳужжат Қонун ҳужжатлари маълумотлари миллий базасида эълон қилинган ва 23.01.2026 йилдан кучга кирди.
Лола Абдуазимова
