Президентнинг 04.02.2026 йилдаги "Маҳаллий ишлаб чиқариш ва саноат кооперациясини янги тизим асосида ривожлантириш бўйича биринчи навбатдаги чора-тадбирлар тўғрисида"ги ПФ-17-сон Фармони қабул қилинди.
Ҳужжат саноат кооперацияси ва давлат харидлари соҳасида яхлит ва мувофиқлаштирилган давлат сиёсатини шакллантиришга қаратилган. Энг муҳим янгилик – Саноат кооперацияси ва давлат харидлари агентлиги ташкил этилиб, унга Иқтисодиёт ва молия вазирлигининг тегишли функциялари ўтказилмоқда. Агентлик ишлаб чиқариш занжирларини ривожлантириш, бозор механизмларини жорий этиш ва ишлаб чиқаришни маҳаллийлаштиришни қўллаб-қувватлаш учун масъул бўлади.
Ҳужжатда мамлакатда бутловчи қисмлар, хомашё ва материаллар ишлаб чиқаришни ўзлаштириш орқали иқтисодиётнинг импортга қарамлигини камайтириш, шунингдек, Ўзбекистон корхоналарининг глобал таъминот занжирларига интеграциялашувига алоҳида эътибор қаратилган. Кичик ва ўрта бизнесни йирик корхоналар ва инвестиция лойиҳаларининг ишлаб чиқариш занжирларига жалб этишга алоҳида эътибор қаратилди.
2026 йилдан бошлаб саноат кооперациясини ривожлантиришга дастурий ёндашув жорий этилади – тармоқлар, ҳудудлар ва иқтисодиётнинг драйвер соҳалари бўйича ўрта ва узоқ муддатли дастурлар шакллантирилади. Агентлик, шунингдек, ўзлаштиришга тавсия этилган рақобатбардош маҳсулотлар рўйхатини эълон қилишни ва уларни ишлаб чиқаришни йўлга қўйган тадбиркорлар билан кафолатланган харид шартномаларини тузишни бошлайди.
Молиявий қўллаб-қувватлаш фармоннинг муҳим элементига айланмоқда: Агентлик ҳузурида Саноат кооперациясини ривожлантириш давлат мақсадли жамғармаси ташкил этилмоқда. Унинг ҳисобидан имтиёзли кредитлар, технологиялар трансфери, брендларни сотиб олиш ва саноат стартапларини ривожлантириш учун субсидиялар ажратиш кўзда тутилган.
Ислоҳотларнинг алоҳида блоки давлат харидларига бағишланган. Харидларни лотларга бўлиш, ялпи эгалик қилиш қиймати усули, маҳаллий ишлаб чиқарувчилар учун нарх преференциялари ва иштирокчиларни баҳолашнинг электрон скоринг тизими жорий этилади. 2027-2028 йиллардан бошлаб харидларда иштирок этиш фақат сертификатланган харид мутахассислари мавжуд бўлган тақдирдагина мумкин бўлади.
Фармон, шунингдек, янги кадрлар сиёсатининг асосларини – инвести– ция лойиҳалари учун мутахассислар тайёрлашдан тортиб, саноат кооперациясини ривожлантириш ва янги турдаги маҳсулотларни ўзлаштиришга жалб қилинган ходимларни моддий рағбатлантиришгача белгилайди.
Умуман олганда, ҳужжат маҳаллий ишлаб чиқаришни ривожлантиришнинг узоқ муддатли архитектурасини шакллантиради, давлатнинг мувофиқлаштирувчи сифатидаги ролини кучайтиради, бироқ бозор механизмлари, рақобат ва бизнес ташаббусига таянади.
Ҳужжат Қонун ҳужжатлари маълумотлари миллий базасида эълон қилинган ва 07.02.2026 йилдан кучга кирди.
