Вазирлар Маҳкамасининг 20.02.2026 йилдаги 74-сон қарори билан Суд экспертизасини ўтказишда электрон ахборот тизимлари орқали ҳужжатлар алмашинувини ташкил этиш тартиби тўғрисидаги низом тасдиқланди.
Президентнинг 8.09.2025 йилдаги ПҚ-270-сон қарорига мувофиқ экспертиза тайинловчи органлар ва суд-экспертиза ташкилотлари ўртасида "E-ekspertiza" платформасини ушбу органларнинг ахборот тизимлари билан тўлиқ интеграция қилиш орқали ўзаро электрон ахборот алмашинувини йўлга қўйиш назарда тутилган.
Ҳужжат қуйидаги тартибларни белгилайди:
• электрон ахборот тизимлари орқали ҳужжатлар алмашинуви;
• суд экспертизасини тайинлаш ва иш материалларини юбориш;
• сўровларни қабул қилиш ва тадқиқотлар ўтказиш;
• эксперт тадқиқотлари натижалари бўйича хулоса тайёрлаш ва уни электрон ахборот тизимлари орқали юбориш.
Экспертиза тайинлаш тўғрисидаги қарор (ажрим) ва иш материаллари "E-ekspertiza" платформаси орқали юборилмаган тақдирда, суд-экспертиза ташкилотлари томонидан бундай қарор (ажрим) асосида экспертиза ўтказилишига йўл қўйилмайди.
Низомда электрон ахборот тизимлари орқали келиб тушган ҳужжатларни экспертизани тайинлаган органга қайтариш асослари ҳам белгиланган.
Бундан ташқари, "E-ekspertiza" платформасида шартнома асосида тўланиши лозим бўлган иш материаллари бўйича электрон тўловни амалга ошириш имконияти яратилмоқда.
Экспертизани тайинлаган орган (шахс) ўзи тайинлаган экспертизанинг бажарилиш ҳолатини онлайн режимда кузатиб бориши мумкин бўлади.
Қайд этилишича, Низомнинг қабул қилиниши экспертизаларни ўтказиш вақтини кескин қисқартириш, ортиқча оворагарчиликлар, почта харажатлари ва бюрократик тўсиқларни бартараф этиш, шунингдек, суд экспертизаси соҳасига АКТни кенг жорий этишга хизмат қилади.
Ҳужжат Қонун ҳужжатлари маълумотлари миллий базасида эълон қилинган ва 23.02.2026 йилдан кучга кирди.
Лола Абдуазимова
