Президентнинг 17.04.2026 йилдаги «Қорақалпоғистон Республикасида махсус майнинг зонасини ташкил этиш ва унинг фаолиятини йўлга қўйиш чора-тадбирлари тўғрисида»ги ПҚ-143-сон қарори қабул қилинди.
Қорақалпоғистон Республикаси Вазирлар Кенгаши муассислигида масъулияти чекланган жамият шаклида «Besqala Mining Valley» махсус майнинг зонаси дирекцияси ташкил этилмоқда, у резидентларни рўйхатдан ўтказади ва уларнинг ҳисобини юритади.
Дирекция Истиқболли лойиҳалар миллий агентлигининг майнинг фаолиятини амалга ошириш учун рухсатномалар бериш бўйича ишчи органи этиб белгиланди.
Талабгорлар (юридик шахслар) махсус зона резиденти мақомини ва майнинг фаолиятини амалга ошириш учун рухсатнома олиш тўғрисидаги ариза билан Дирекцияга мурожаат қилишлари мумкин.
Махсус зона доирасида резидентларга қуйидаги ҳуқуқлар берилади:
- майнингни амалга ошириш учун ягона электр энергетика тизимидан ва барча турдаги қайта тикланувчи энергия манбаларидан, шу жумладан, водород электр станцияларида ишлаб чиқарилган электр энергиясидан фойдаланиш;
- майнинг натижасида олинган крипто-активларни белгиланган тартибда миллий крипто-биржалар ёки хорижий платформалар орқали, шу жумладан, тўғридан-тўғри шартномалар асосида сотиш ва (ёки) уларни бошқа ликвидли крипто-активларга айирбошлаш;
- майнингни амалга ошириш натижасида ҳосил бўладиган иссиқлик энергияси ҳисобидан қишлоқ хўжалигига мўлжалланган ер участкаларида белгиланган тартибда иссиқхоналар ташкил этиш.
Инвестициявий фаолиятни рағбатлантириш учун ҳужжат билан белгиланишича, 2035 йил 1 январга қадар резидентларнинг майнинг бўйича операциялардан олинган даромадлари солиқлар ва йиғимлардан озод қилинади.
Ҳужжат Қонунчилик маълумотлари миллий базасида давлат тилида эълон қилинган ва 20.04.2026 йилдан кучга кирди.
Лола Абдуазимова
