Vazirlar Mahkamasining 2017 yil 22 noyabrdagi 936-son qarori bilan quyidagilarni tashkil etish toʻgʻrisidagi takliflar ma’qullandi:
- Fanlar akademiyasining Qatagʻon qurbonlari хotirasi davlat muzeyi negizida Vazirlar Mahkamasi huzuridagi Qatagʻon qurbonlari хotirasi davlat muzeyini (keyingi oʻrinlarda - Muzey);
- Qoraqalpogʻistonda va viloyatlarda 13 ta oliy ta’lim muassasasi tuzilmasida yuridik shaхs maqomiga ega boʻlmagan Qatagʻon qurbonlari хotirasi muzeylarini (keyingi oʻrinlarda - hududiy muzeylar).
Hujjat bilan Muzey va hududiy muzeylarning asosiy vazifalari, faoliyat yoʻnalishlari, moliyalashtirish manbalari belgilandi, shuningdek ularning tuzilmasi, Muzeyning ustavi va hududiy muzeylarning namunaviy nizomi tasdiqlandi.
Tegishli tashkilotlarga 2018 yil 1 martgacha hududiy muzeylar ekspozitsiyalarini yaratish, mustamlakachilik va qatagʻon davriga oid hujjatlar, materiallar va ashyolar bilan toʻldirish topshirildi.
Shuningdek 2018-2019 yillar uchun Oʻzbekiston Respublikasi Investitsiya dasturini shakllantirishda Muzeyni rekonstruksiya qilish boʻyicha ishlar nazarda tutiladi.
Hujjat 2017 yil 25 noyabrda kuchga kirdi.
Mazkur hujjatning matni bilan, u bilan bogʻlangan boshqa qonun hujjatlariga sharhlar va izohlar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Sardor JUMAShOV,
ekspert-yuristimiz.
