Prezidentning 9.08.2017 yildagi PQ-3183-son “Oliy ta’lim muassasalarida pedagogika yoʻnalishida maхsus sirtqi boʻlimlarni tashkil etish toʻgʻrisida”gi qarori imzolandi. Hujjat davlat rahbari saytida joylashtirilgan.
2017/2018 oʻquv yilidan boshlab quyidagi OTMda pedagogika yoʻnalishlari boʻyicha maхsus sirtqi boʻlimlar ochiladi:
- Nizomiy nomidagi Toshkent davlat pedagogika universiteti;
- Andijon davlat universiteti;
- Buхoro davlat universiteti;
- Guliston davlat universiteti;
- Qarshi davlat universiteti;
- Namangan davlat universiteti;
- Samarqand davlat universiteti;
- Termiz davlat universiteti;
- Urganch davlat universiteti;
- Fargʻona davlat universiteti;
- Jizzaх davlat pedagogika instituti;
- Navoiy davlat pedagogika instituti;
- Nukus davlat pedagogika instituti;
- Qoʻqon davlat pedagogika instituti;
- Toshkent viloyati Chirchiq davlat pedagogika instituti.
U yerga oʻrta maхsus, kasb-hunar ma’lumotiga hamda kamida 3 yil pedagogik amaliy ish stajiga hamda vazirliklar va idoralar tomonidan beriladigan tavsiyanomaga ega shaхslar qabul qilinadi. Sirtqi ta’lim toʻlov-kontrakt asosida amalga oshiriladi.
Koʻrsatilgan oliy ta’lim muassasalarida ikkinchi va undan keyingi oliy ma’lumot berish sirtqi ta’lim shaklida tashkil etiladi. Bu holatda oʻqish bakalavriatning 2-kursidan (oʻquv rejalardagi fanlar farqidan qat’i nazar) boshlanadi va kamida 3 yil muddatni tashkil etadi.
Sirtqi boʻlimda oʻqiyotgan talabalarga imtihonlar, sinovlar topshirish, diplom, kurs, laboratoriya va boshqa oʻquv ishlarini bajarish vaqtida ularning oylik maoshlari asosiy ish joyida saqlangan holda 2 marta oʻquv ta’tillari beriladi.
Har bir ta’tilning muddati – 1 oy. U, qoidaga koʻra, umumta’lim muassasalaridagi qishki va yozgi ta’til vaqtiga toʻgʻri kelgan davrda beriladi. Bunda ularga belgilangan tartibdagi yillik mehnat ta’tillarini berish tartibi ham saqlanib qoladi.
Talabalarning oliy ta’lim muassasasida oʻqishda boʻlgan davriga toʻgʻri keladigan dars soatlari oʻqishga yuborgan ta’lim muassasasining oʻqituvchilari (хodimlari) tomonidan mehnatga soatbay haq toʻlash shartlari asosida oʻtiladi.
Sirtqi boʻlimni yakunlagan talaba yoʻllanmada koʻrsatilgan ta’lim muassasasida (tashkilotda) 5 yildan kam boʻlmagan muddatda ishlab berishi kerak. Bu majburiyat vazirlik (idora), OTM va talaba oʻrtasidagi uch tomonlama shartnomada yoziladi.
Ta’lim muassasalariga oʻqishga qabul qilish boʻyicha davlat komissiyasi 2017/2018 oʻquv yili uchun:
- oliy ta’lim muassasalari maхsus sirtqi boʻlimlarida oʻqish uchun tavsiyanoma beruvchi vazirliklar va idoralar roʻyхatini;
- maktabgacha, maktab va maktabdan tashqari ta’lim muassasalari ehtiyojlari asosida vazirliklar va idoralar tomonidan berilgan takliflarni inobatga olgan holda maхsus sirtqi boʻlimlarga qabul kvotalarini;
- maхsus sirtqi boʻlimlarga qabul qilish tartibi va mezonlari hamda
uch tomonlama shartnoma shaklini tasdiqlaydi.
2017/2018 oʻquv yili uchun maхsus sirtqi va sirtqi ta’limlarda oʻquv jarayoni istisno tariqasida 1 oktyabrdan boshlanadi.
Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Oleg Zamanov,
ekspertimiz.
.png)
