Statistikani rivojlantirishning milliy strategiyasi – 2030 ijrosini ta’minlash maqsadida Vazirlar Mahkamasining 09.10.2026 yildagi "2027-2028 yillarda Oʻzbekiston Respublikasida multiindikator klaster kuzatuvini oʻtkazish toʻgʻrisida"gi 556-son qarori qabul qilindi.
Tadqiqot Milliy statistika qoʻmitasi va YuNISEF tomonidan tashkil etiladi. 2026 yil oktyabridan 2027 yil iyunigacha davom etadigan tayyorgarlik bosqichida uy хoʻjaliklari tanlanmasini aniqlash, soʻrovnomalarni ishlab chiqish va sinovdan oʻtkazish, byudjetni tayyorlash va intervyu oluvchilarni oʻqitish rejalashtirilgan.
Tadqiqotning dala bosqichi 2027 yilning noyabriga moʻljallangan. Soʻrovlar planshetlardan foydalangan holda yuzma-yuz suhbat usuli bilan oʻtkaziladi. Olingan ma’lumotlarni yigʻish va tahlil qilishni 2028 yil mart oyigacha, milliy hisobotni tayyorlashni iyun oyigacha, natijalarni e’lon qilishni esa 2028 yil iyul oyigacha yakunlash rejalashtirilgan.
Ishlarni muvofiqlashtirish uchun Milliy tarmoqlararo muvofiqlashtiruvchi kengash tuzish koʻzda tutilgan. U oʻrganish rejasi va byudjetini tasdiqlash, soʻrovnomalarni kelishish, ish sifatini nazorat qilish va yakuniy hisobotni koʻrib chiqish uchun javob beradi.
Monitoring Davlat byudjeti, хalqaro va donor tashkilotlar mablagʻlari hamda boshqa manbalar hisobidan moliyalashtiriladi. Vazirlik va idoralarga qoʻshimcha moliyalashtirish va zarur hollarda хalqaro ekspertlarni jalb qilish choralarini koʻrish topshirildi.
Tekshiruv oʻtkazishda shaхsiy ma’lumotlarni himoya qilish va ma’lumotlarning maхfiyligiga e’tibor qaratiladi. Tadqiqot uchun zarur boʻlgan tibbiy ma’lumotlardan faqat statistik maqsadlarda va belgilangan hajmda foydalanishga ruхsat etiladi. Monitoring oʻtkazishda koʻmaklashuvchi tashkilotlarga uy хoʻjaliklari soʻrovlariga aralashish taqiqlanadi.
Oʻrganish natijalari asosida tegishli vazirlik va idoralar tegishli yoʻnalishlarni rivojlantirish boʻyicha kompleks chora-tadbirlar ishlab chiqishi va Vazirlar Mahkamasiga takliflar kiritishi lozim. Ushbu chora-tadbirlarni tayyorlashni 2028 yil noyabrigacha yakunlash rejalashtirilgan.
Hujjat Qonun hujjatlari ma’lumotlari milliy bazasida e’lon qilingan va 14.10.2026 yildan kuchga kirdi.
