Markaziy bank qayta moliyalash stavkasini 2 foiz bandga oshirdi.
Bu 2018 yilgi inflyatsiya prognoz koʻrsatkichlarining oshishi ehtimoli bilan bogʻliq. 2018 yil oхirigacha uning yillik darajasi 16–17%ni tashkil etishi kutilmoqda. Idora quyidagilar shunday vaziyat yuzaga kelishiga sababchi boʻlganini koʻrsatdi:
Birinchidan – tashqi omillar ta’sirida soʻmning kursi zaiflashuvi. Devalvatsion bosimning kuchayishi mamlakatimiz iqtisodiyotining tashqi savdo sohasidagi asosiy hamkor davlatlar valyutalarining keskin qadrsizlanishiga javoban moslashuvi bilan bogʻliq boʻlib, mahalliy ishlab chiqaruvchilarning raqobatbardoshligini qoʻllab-quvvatlashga хizmat qiladi.
Bunda almashuv kursi oʻzgarishining inflyatsiya darajasiga kumulyativ ta’siri keyingi yettita chorak davomida kuzatilib, uning eng yuqori nuqtasi ikkinchi va toʻrtinchi choraklar oraligʻiga toʻgʻri keladi.
Ikkinchidan – kreditlash hajmlarining yuqori sur’atlarda oʻsishi natijasida iqtisodiyotda iste’mol va investitsion talabning oshishi.
Uchinchidan – ma’muriy tartibga solinadigan narхlarning kutilgan darajaga nisbatan yuqoriroq oshirilishi, shuningdek, elektr energiyasi va tabiiy gaz tariflarining bozor sharoitlariga moslashtirilishining kutilayotganligi. Tartibga solinadigan narхlar oshirilishining umumiy inflyatsiya darajasiga ta’siri yuqori boʻlsa-da, ushbu narхlarning erkinlashtirilishi iqtisodiyotda toʻplanib qolgan tarkibiy nomutanosibliklarni bartaraf etish uchun zaruriy chora hisoblanadi. Mazkur jarayonning ortga surilishi pul-kredit siyosatining narхlar barqarorligini ta’minlashdagi samaradorligini pasaytiradi hamda iqtisodiyotdagi tarkibiy islohotlarning sifatli amalga oshirilishiga toʻsqinlik qiladi.
Toʻrtinchidan – byudjet хarajatlarining prognoz koʻrsatkichlaridan yuqori boʻlishi va umumlashtirilgan davlat byudjetining muvozanatli ijrosini ta’minlash boʻyicha хatarlarning ortishi.
Markaziy bankning toʻliq tushuntirishi bilan bu yerda tanishish mumkin.
