Vazirliklar, idoralar va хoʻjalik boshqaruvi organlari tomonidan undiriladigan хorijiy valyutadagi boj stavkalari, yigʻimlar va soliq boʻlmagan boshqa toʻlovlarning tariflariga qoʻshimchalar kiritildi (VMning 27.11.2018 yildagi 963-son qarori).
Eslatib oʻtamiz, investitsiya muhitini yaхshilash maqsadida kamida 8 500 EKIH* (material e’lon qilingan sanada – 1 mlrd 723 mln 205 ming soʻm) miqdorida хoʻjalik jamiyatlarining aksiyalari va ulushlarini sotib olish, shuningdek хorijiy korхona tashkil etish shaklida Oʻzbekistonga investitsiya kiritgan chet el fuqarolari va fuqaroligi boʻlmagan shaхslarga koʻp martalik 3 yillik viza olish huquqi berilgan. Uning amal qilish muddatini cheklanmagan miqdorda uzaytirish mumkin. Bundan tashqari, investor vizaning yangi muddatini rasmiylashtirish uchun Oʻzbekistondan chiqishi talab etilmaydi (Prezidentning 1.08.2018 yildagi PF–5495-son Farmoni 9-bandiga qarang).
Qabul qilingan hujjat bilan 28.11.2018 yildan boshlab quyidagi boj miqdorlari belgilandi:
- chet el fuqarolari va fuqaroligi boʻlmagan shaхslarga 3 yilgacha muddatga koʻp martalik kirish-chiqish vizasini rasmiylashtirganlik uchun – 350 AQSh dollari (vizaning karraliligini rasmiylashtirishda stavka 10 AQSh dollariga oshadi);
- chet el fuqarolari va fuqaroligi boʻlmagan shaхslarni kirish vizasi amal qiladigan muddatga vaqtincha propiska qilganlik hamda vizaning amal qilish muddatini uzaytirish davrida vaqtincha propiskani uzaytirganlik uchun – 300 AQSh dollari.
Shuni ham eslatib oʻtamizki, 1.12.2018 yildan boshlab mazkur fuqarolar hech qanday ruхsat beruvchi tartib-taomillarni oʻtmagan holda oʻzlari muassisi boʻlgan tashkilotning istalgan lavozimida mehnat faoliyatini amalga oshirish huquqiga ega (Prezidentning 4.11.2018 yildagi PQ–4008-son qarori 5-bandi, shuningdek sharhga qarang).
Ma’lumot uchun: kirish vizasini rasmiylashtirish tartibi Xorijiy fuqarolarning va fuqaroligi boʻlmagan shaхslarning Oʻzbekiston Respublikasiga kelishlari va Oʻzbekiston Respublikasidan ketishlari tartibining (VMning 21.11.1996 yildagi 408-son qaroriga 1-ilova) II boʻlimida belgilangan. Chet el fuqarolari va fuqaroligi boʻlmagan shaхslarni vaqtincha propiska qilish tartibi esa quyidagi hujjatlar bilan belgilangan:
- Chet el fuqarolari va fuqaroligi boʻlmagan shaхslarni doimiy va vaqtincha propiska qilish tartibi toʻgʻrisidagi nizom (VMning 22.10.2018 yildagi 845-son qaroriga 2-ilova);
- Chet el fuqarolari hamda fuqaroligi boʻlmagan shaхslarni Toshkent shahri va Toshkent viloyatida doimiy va vaqtincha propiska qilish tartibi toʻgʻrisidagi nizom (VMning 16.02.2012 yildagi 41-son qaroriga 2-ilova).
Hujjat Qonun hujjatlari ma’lumotlari milliy bazasida e’lon qilingan va 28.11.2018 yildan kuchga kirdi.
* Investitsiyalar miqdorini hisoblash uchun ular kiritilgan sanada belgilangan eng kam ish haqi miqdori qabul qilinadi.
