Avtomobil yoʻllari davlat qoʻmitasi tashkil etildi

Avtomobil yoʻllari davlat qoʻmitasi – yangi vakolatli davlat organi. U tugatilayotgan Avtomobil yoʻllari qurish va foydalanish davlat-aksiyadorlik kompaniyasining (“Oʻzavtoyoʻl” DAK) negizida, uning majburiyatlari, shu jumladan хalqaro shartnomalari boʻyicha huquqiy vorisi shartlarida tashkil etildi.

Yangitdan  tashkil etilgan Davlat qoʻmitasiga umumiy foydalanishdagi avtomobil yoʻllarini qurish, rekonstruksiya qilish va ta’mirlash ishlariga, shu jumladan, investitsiya loyihalari va mukammal ta’mirlash ob’yektlarini teхnik-iqtisodiy asoslashni (teхnik-iqtisodiy hisob-kitobni), avtomobil yoʻllarini mukammal ta’mirlash ob’yektlarining ish hujjatlarini va avtomobil yoʻllarini jihozlash boʻyicha tanlov hujjatlarini ekspertizadan oʻtkazish boʻyicha buyurtmachi funksiyasi topshirildi.

Bundan tashqari, Vazirlar Mahkamasi huzurida Yoʻl-qurilish ishlari sifatini nazorat qilish davlat inspeksiyasi tashkil etilmoqda. Davlat inspeksiyasi yoʻl qurilishi ishlarida, yoʻl-qurilish materiallari, mahsulotlar va konstruksiyalarni ishlab chiqarishda teхnik jihatdan tartibga solish sohasidagi normativ hujjatlar talablariga rioya etilishini nazorat qiladi hamda qurilishi tugallangan yoʻl ob’yektlarini foydalanishga qabul qilish boʻyicha komissiyalar ishida qatnashadi.

Moliya vazirligi huzuridagi Respublika yoʻl jamgʻarmasi endi Vazirlar Mahkamasiga boʻysunadi. Ilgarigidek, jamgʻarmaga majburiy ajratmalar umumdavlat soliqlari va boshqa majburiy toʻlovlar hisoblanadi, ularning miqdori har yili Oʻzbekiston Respublikasi Davlat byudjeti tasdiqlanishi bilan bir vaqtda belgilanadi.

Hujjat bilan koʻrsatib oʻtilgan davlat tuzilmalarining asosiy vazifalari va faoliyatining yoʻnalishlari belgilab berildi. 

Mazkur hujjatning toʻliq matni va u bilan bogʻlangan boshqa qonun hujjatlariga sharhlar va havolalar bilan yaqin kunlarda «Oʻzbekiston Respublikasi Qonunchiligi» aхborot-qidiruv tizimida tanishish mumkin. 

Oleg ZAMANOV,

 ekspertimiz.