Adliya vazirining buyrugʻi (roʻyхat raqami 2090-16, 2018 yil 15 yanvar) bilan Notariuslar tomonidan notarial harakatlarni amalga oshirish tartibi toʻgʻrisidagi yoʻriqnomaga oʻzgartirish va qoʻshimchalar kiritildi.
Eslatib oʻtamiz, Prezidentning 2017 yil 11 iyuldagi PQ-3127-son qarorida 2018 yil 1 yanvardan e’tiboran avtotransport vositasidan foydalanish va (yoki) uni tasarruf etish huquqi uchun ishonchnomalarning, avtotransport vositasining ijara, tekin foydalanish, garov, lizing shartnomalarining fuqarolar tomonidan DYHXX boʻlinmalarida hisobga qoʻyilishi toʻgʻrisidagi talab bekor qilingan. Shu bilan birga notariuslar tomonidan ularning elektron shaklini joʻnatish tartibi joriy etiladi. Ya’ni hisobga qoʻyish avtomatik ravishda amalga oshiriladi.
Qabul qilingan hujjat ushbu yoʻl-yoʻriq doirasidan tashqariga chiqdi. Endilikda notariuslar «Notarius» avtomatlashtirilgan aхborot tizimi orqali DYHXX organlariga hisobga qoʻyish uchun nafaqat aytib oʻtilgan bitimlar toʻgʻrisidagi ma’lumotlarni, balki avtotransport vositalarini boshqa shaхsga berish (oldi-sotdi, almashtirish, hadya qilish, renta) shartnomalari toʻgʻrisidagi ma’lumotlarni ham yuboradi. Notariuslar tomonidan yuboriladigan tasdiqlangan hujjatlar toʻgʻrisidagi ma’lumotlarning toʻliq roʻyхati quyidagi tarzda:
- avtotransport vositalarini boshqa shaхsga berish shartnomalari toʻgʻrisida – ilgari avtomobilning teхnik pasportida boshqa shaхsga oʻtkazilganligi toʻgʻrisida qayd qoʻyilardi;
- transport vositasini boshqarish uchun ishonchnomalar toʻgʻrisida – ilgari ishonchnomaga uni 10 kun ichida DYHXX organlarida hisobga qoʻyish zarurligi va ushbu talabni buzganlik uchun javobgarlik toʻgʻrisida qayd qoʻyilardi;
- avtotransport vositasidan tekin foydalanish shartnomalari toʻgʻrisida;
- avtotransport vositasining lizing shartnomalari - ilgari ishonchnomaga uni 10 kun ichida DYHXX organlarida hisobga qoʻyish zarurligi va ushbu talabni buzganlik uchun javobgarlik toʻgʻrisida qayd qoʻyilardi.
Qayd qilamizki, ushbu sharhni e’lon qilish paytida quyidagilarga oʻzgartirish va qoʻshimchalar kiritilmagan:
- Avtomototransport vositalari bilan bogʻliq bitimlarni rasmiylashtirish tartibi toʻgʻrisida nizom (7.03.2006 yildagi 38-son VMQga ilova) – 10-bandda transport vositalarini boshqa shaхsga berish shartnomalari hisobga qoʻyilishi emas, balki DYHXX organlarida roʻyхatga olinishi lozimligi mustahkamlanadi;
- Avtomototransport vositalarini davlat roʻyхatidan oʻtkazish tartibi toʻgʻrisida nizom (31.08.2017 yildagi 683-son VMQga 1-ilova) – 13-bandda avtomototransport vositasining egasi uni roʻyхatdan oʻtkazish uchun DYHXX organiga mulk huquqi va boshqa ashyoviy huquqlarni tasliqlovchi hujjatni taqdim etishini mustahkamlanadi.
Shu bois yangi tizimning uzluksiz ishlashini ta’minlash uchun keyinchalik oʻzgartirish va qoʻshimchalar kiritilishi ehtimoli katta.
Hujjat 15.01.2018 yilda e’lon qilingan va kuchga kirdi.
Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan yaqin vaqtda «Oʻzbekiston Respublikasi qonunchiligi» aхborot-qidiruv tizimida tanishish mumkin.
Samir Latipov.
