Oʻzbekiston Standartlashtirish, metrologiya va sertifikatlashtirish agentligi bosh direktorining buyrugʻi (13.06.2018 yilda 1458-4-son bilan roʻyхatdan oʻtkazilgan) bilan Mahsulotlarni sertifikatlash qoidalariga oʻzgartirish va qoʻshimchalar kiritildi.
Tahririyatdan: mazkur hujjat va 75 000 ta boshqa normativ-huquqiy hujjatlar tushuntirishlari bilan «OʻzR qonun hujjatlari» AQTga jamlangan. Namoyish versiyasini bu yerda koʻchirib olishingiz mumkin (32,1 MB).
Ma’lumot uchun: respublikada ishlab chiqariladigan va unga olib kiriladigan, alohida roʻyхatga kiritilgan mahsulotlar sertifikatlashtirilishi lozim. Oʻzbekiston sertifikatlashtirish milliy tizimida mahsulotlar muvofiqligini tasdiqlashning tavsiya etilayotgan chizmalari (jami 9 ta) qoʻllaniladi.
Joriy yilning 1 iyulidan boshlab mahsulotlarning muvofiqligini tasdiqlovchi yana bitta chizma – 7A amalga kiritiladi. U bitta tashqi savdo kontrakti doirasida chetdan keltirilgan mahsulotni (transport vositalaridan tashqari) sertifikatlashtirishda qoʻllaniladi. Sertifikat 1 kalendar yilidan oshmagan muddatga beriladi.
7A chizmasi boʻyicha sertifikatlashtirish sinovlarini oʻtkazish uchun quyidagi hujjatlarning nusхalarini taqdim etish zarur:
- mahsulotning aniq hajmi (soni) koʻrsatilgan tashqi savdo kontrakti;
- mahsulotni yetkazib beruvchi hamda qabul qiluvchi oʻrtasida tuzilgan kelishuv.
Hujjat Qonun hujjatlari ma’lumotlari milliy bazasida e’lon qilingan va 1.07.2018 yildan kuchga kirdi.
Lenara Xikmatova.
