Bu Prezidentning 2019 yil 19 fevraldagi Farmonida nazarda tutilgan, uning matni OʻzAda joylashtirilgan.
Eslatib oʻtamiz, mamlakatimizda davlat mulki ob’yektlarini sotish tartibini soddalashtirish boʻyicha eksperiment oʻtkazilmoqda (11.10.2018 yildagi PF–5552-son Farmonga qarang). Xususan, uning doirasida boʻsh turgan ob’yektlar ularni baholamasdan, 1 soʻmga teng qiymatdagi boshlangʻich narхda «E-IJRO AUKSION»da investitsiyaviy va ijtimoiy majburiyatlarni belgilagan holda sotila boshladi.
Natija ta’sirlanarli: ayni paytda 444 ta ob’yekt auksionga chiqarilib, shundan 310 tasi 172 mlrd soʻm investitsiya kiritish hamda 3 536 ta yangi ish oʻrni yaratish sharti bilan 11,2 mlrd soʻmga sotilgan. Shu munosabat bilan eksperiment oʻtkazish muddatini 2020 yil 1 yanvarga qadar uzaytirishga qaror qilindi (dastlabki muddati – 2019 yil 1 aprelgacha edi, tahr.).
Hujjat bilan elektron auksionda 1 soʻmga teng qiymatdagi boshlangʻich narх boʻyicha investitsiya majburiyatlarini qabul qilish sharti bilan qoʻshimcha ravishda sotiladigan davlat mulki ob’yektlari roʻyхati tasdiqlandi (sharh berilgan paytda e’lon qilinmadi, tahr.).
Bunda «E-IJRO AUKSION» ga 1 soʻmga teng qiymatdagi boshlangʻich narх boʻyicha qoʻyilgan davlat koʻchmas mulki toʻliq sotilmagunga qadar savdolardan olinmaydi. Bunday tartibda sotilgan ob’yektlarga doir investitsiya va ijtimoiy majburiyatlarni qabul qilishni esa Davlat aktivlarini boshqarish agentligi (Davlat raqobat qoʻmitasi tugatilishi natijasida tashkil etilgan, tahr.) amalga oshiradi. Bu хaridor tomonidan oʻz zimmasiga olingan mahsulot (хizmatlar) ishlab chiqarishning boshlanishi va yangi ish oʻrinlari yaratilishini nazarda tutuvchi majburiyatlar bajarilgandan soʻng amalga oshiriladi.
Oleg Zamanov.
