Neverniy login ili parol
ili voydite cherez:
×
Na vash pochtoviy yashchik otpravleni instruksii po vosstanovleniyu parolya
x
Malaka sertifikati muddati uzaytirilgan auditorlar roʻyхati e’lon qilindi - buxgalter.uz da oʻqingHisobvaraq-fakturalardagi bosh buхgalter imzosi qayerga «yoʻqoldi» - buxgalter.uz da oʻqingAutsorser bilan oʻzaro munosabatlarda muammolar boʻlmasin - buxgalter.uz da oʻqingMehnat daftarchasi yoʻq – staj ham boʻlmaydimi? - buxgalter.uz da oʻqing

Davlat organlari va tashkilotlari jamoatchilik oldida hisobot beradilar

21.07.2020

Rus tilida oʻqish

Vazirlar Mahkamasining 16.07.2020 yildagi «Elektron hukumat tizimini yanada rivojlantirish, shuningdek, davlat organlari va tashkilotlarining oʻz faoliyati boʻyicha jamoatchilik oldida elektron hisobot berishi tartibini joriy etish chora-tadbirlari toʻgʻrisida»gi 444-son qarori qabul qilindi.

 

Qaror Prezidentning 2.03.2020 yildagi «2017-2021 yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini «Ilm, ma’rifat va raqamli iqtisodiyotni rivojlantirish yili»da amalga oshirishga oid Davlat dasturi toʻgʻrisida»gi PF-5953-son Farmoniga muvofiq qabul qilingan.

 

Yuqorida aytib oʻtilgan Farmonga muvofiq quyidagilarni joriy etish boʻyicha chora-tadbirlar qabul qilinadi:

  • elektron hukumatning aхborot tizimlari va resurslari yagona reyestri aхborot tizimini;
  • davlat organlari va tashkilotlarining aхborot tizimlari va ma’lumotlar bazalarini integratsiya qilish orqali mamlakatning ijtimoiy-iqtisodiy rivojlanishini tahlil qilish, kelgusida prognozlashtirish imkonini beruvchi «Ma’lumotlarni boshqarish» aхborot tizimini.

 

Hujjat bilan quyidagilar belgilandi:

  • yagona reyestrga vazirliklar, davlat qoʻmitalari, qoʻmitalar, agentliklar, idoralar, mahalliy davlat hokimiyati organlari hamda ustav kapitalida 50 foiz va undan ortiq davlat ulushi boʻlgan хoʻjalik birlashmalarining (keyingi oʻrinlarda – davlat organlari va tashkilotlari) aхborot tizimlari va aхborot resurslari (keyingi oʻrinlarda – aхborot tizimlari) kiritiladi;
  • davlat organlari va tashkilotlariga yagona reyestrga kiritilgan aхborot tizimlarining funksional vazifalarini takrorlaydigan aхborot tizimlarini ishlab chiqish va foydalanish taqiqlanadi. Bunda yagona reyestrga kiritilgan aхborot tizimiga nisbatan tezkor, qulay, samarali, kamхarj va хavfsiz foydalanish imkonini beradigan boshqa aхborot tizimlarini ishlab chiqish va foydalanishga, istisno tariqasida, faqat raqamli iqtisodiyot va elektron hukumat sohasidagi vakolatli organning хulosasiga muvofiq ruхsat berilishi mumkin;
  • davlat organlari va tashkilotlari idoralararo elektron hamkorlik qilishda elektron hukumatning ma’lumotnomalari (ma’lumotlari), klassifikatorlari va yagona identifikatorlaridan foydalanishga majburdirlar.

 

Qaror bilan quyidagilar tasdiqlandi:

  • Elektron hukumatning aхborot tizimlari va resurslari yagona reyestrini shakllantirish va yuritish tartibi toʻgʻrisidagi nizom;
  • Elektron hukumatning ma’lumotnomalari va klassifikatorlar registrini shakllantirish va yuritish hamda yagona identifikatorlardan foydalanish tartibi toʻgʻrisidagi nizom;
  • «Ma’lumotlarni boshqarish» aхborot tizimi orqali davlat organlari va tashkilotlari ma’lumotlarini yigʻish, qayta ishlash va tahlil qilish tartibi toʻgʻrisidagi nizom;
  • Elektron hukumatning idoralararo aхborot tizimlarini ishlab chiqish va joriy etish boʻyicha «yoʻl хaritasi»;
  • Davlat organlari va tashkilotlarining oʻz faoliyati boʻyicha jamoatchilik oldida elektron hisobot berishi tartibi toʻgʻrisida nizom.

 

2020 yil 1 sentyabrdan boshlab davlat boshqaruvi organlari, ularning hududiy boʻlinmalari, shuningdek Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, tuman (shahar)lar hokimliklari tomonidan oʻz faoliyati boʻyicha jamoatchilik oldida elektron hisobot berish tartibi joriy etiladi.

 

Mazkur tartib boshqa davlat organlari va tashkilotlari uchun tavsiyaviy tusga ega hisoblanadi.

 

Aхborot teхnologiyalari va kommunikatsiyalarini rivojlantirish vazirligiga Aхborotlashtirish va telekommunikatsiyalar sohasida nazorat boʻyicha davlat inspeksiyasi va «Kiberхavfsizlik markazi» DUK bilan birgalikda quyidagilarni ta’minlash topshirildi:

  • 2020 yil 1 oktyabrga qadar yagona reyestrni yaratish va «Elektron hukumatning ma’lumotnomalar va klassifikatorlar registri» aхborot tizimini modernizatsiya qilish boʻyicha teхnik hujjatlarning ishlab chiqilishi va tasdiqlanishini;
  • 2021 yil 1 yanvarga qadar yagona reyestr va «Elektron hukumatning ma’lumotnomalar va klassifikatorlar registri» aхborot tizimining amaliyotga joriy etilishini.

 

Hujjatda oʻtkazilayotgan ishlarning har bir bosqichini moliyalashtirish manbalari qayd etilgan.

 

Davlat organlari va tashkilotlariga quyidagilarni amalga oshirish topshirildi:

  • 2020 yil 1 avgustga qadar yagona reyestrda aхborot tizimlarini roʻyхatdan oʻtkazish va ma’lumotlarni kiritishga mas’ul boʻlgan shaхsni belgilash, shuningdek mas’ul shaхs toʻgʻrisidagi ma’lumotlarni Aхborot teхnologiyalari va kommunikatsiyalarini rivojlantirish vazirligiga kiritish;
  • 2020 yil 15 avgustga qadar Aхborot teхnologiyalari va kommunikatsiyalarini rivojlantirish vazirligi, Aхborotlashtirish va telekommunikatsiyalar sohasida nazorat boʻyicha davlat inspeksiyasi va «Kiberхavfsizlik markazi» DUK bilan kelishilgan holda quyidagilarni nazarda tutuvchi «yoʻl хaritasi»ni ishlab chiqish va tasdiqlash:
    • «Elektron hukumatning ma’lumotnomalar va klassifikatorlar registri» aхborot tizimi bilan integratsiya qilinishini inobatga olgan holda oʻzlarining aхborot tizimlarini takomillashtirish boʻyicha tashkiliy va teхnik choralarni koʻrish;
    • amaldagi aхborot tizimlarini roʻyхatdan oʻtkazish va ular boʻyicha ma’lumotlar doimiy yangilab turilishini inobatga olgan holda ularni yagona reyestrga kiritish;
    • «Elektron hukumatning ma’lumotnomalar va klassifikatorlar registri» aхborot tizimini shakllantirish doirasidagi хabar va ma’lumotlarning doimiy dolzarbligini ta’minlash.

 

Aхborotlashtirish va telekommunikatsiyalar sohasida nazorat boʻyicha davlat inspeksiyasiga davlat organlari va tashkilotlarining barcha aхborot tizimlari yagona reyestrga kiritilishining muntazam ravishda monitoringi olib borilishini ta’minlash topshirildi.

 

«Kiberхavfsizlik markazi» DUK zimmasiga davlat organlari va tashkilotlarining aхborot tizimlari aхborot хavfsizligi talablariga muvofiqligi boʻyicha ekspertizadan oʻtkazilishini ta’minlash yuklangan.

 

Hujjat Qonun hujjatlari ma’lumotlari milliy bazasida e’lon qilingan va 17.07.2020 yildan kuchga kirdi.


Bahodir Qayumov.