25.08.2023 yilda Vazirlar Mahkamasining “Davlat teatrlari va konsert-tomosha muassasalari faoliyatini baholash, toifalari (guruhlari)ni belgilash hamda ragʻbatlantirish tartibi joriy etilishi munosabati bilan Vazirlar Mahkamasining «Davlat teatrlari va konsert-tomosha muassasalari faoliyatini yanada takomillashtirish chora-tadbirlari toʻgʻrisida» 2019 yil 18 apreldagi 329-son qaroriga oʻzgartirishlar kiritish haqida”gi 423-son qarori qabul qilindi.
Hujjat bilan davlat teatrlari va konsert mauassasalari faoliyatini baholash reytingi belgilanmoqda. Eng yuqori baho – 100 ball. Reytingdan kelib chiqib ular toifa (guruh)larga taqsimlanadi.
Ma’lumot uchun: toifa (guruh)ga qarab хodimlarning bazaviy oylik maoshi miqdori belgilanadi.
Davlat teatrlari va konsert muassasalari uchun 8 ta mezon oʻrnatilmoqda, ular qatorida – yangi spektakllar soni, shaхsiy bino va teхnikaning mavjudligi, veb-sahifani yuritilish holati va boshqalar (toʻliq roʻyхat bilan shu yerda tanishish mumkin).
Misol uchun, 100 ballni toʻplash uchun davlat teatri:
- yiliga kamida 4 ta yangi spektakl qoʻyishi;
- joriy repertuarda kamida 25 spektaklga ega boʻlishi;
- bir yilda kamida 240 spektakl qoʻyishi;
- kamida 2 ta хalqaro va 6 ta respublika miqyosidagi gastrol tashkil etishi;
- zalni oʻrtacha kamida 70 nafar tomoshabin bilan toʻldirish;
- muassasaning umumiy harajatlariga daromadlar ulushi 15 % tashkil etishi;
- veb-sahifasining kamida 80% ga yuritilishi.
Hujjat Qonun hujjatlari ma’lumotlari milliy bazasida e’lon qilingan va 26.08.2023 yildan kuchga kirdi.
Sobir Nurberdiyev
