Prezidentning 27.03.2026 yildagi PQ-117-son qarorida jazoni ijro etish muassasalarida yoshlarni zamonaviy kasblarga oʻqitish chora-tadbirlari belgilangan.
Ozodlikdan mahrum qilish jazosini oʻtayotgan 18 – 30 yoshdagi mahkumlarni zamonaviy raqamli kasblarga oʻqitishning asosiy maqsadlari:
- tasdiqlangan oʻquv dasturlari doirasida bilim olish va zamonaviy raqamli kasblarni egallash;
- zamonaviy raqamli kasblarni egallash uchun zarur boʻlgan darajada хorijiy tillarni (ingliz, rus, хitoy va boshqalar) oʻrgatish;
- mehnat bozorida talab yuqori boʻlgan kasblarni egallash uchun unda mehnat koʻnikmalarini shakllantirish va mustahkamlash;
- kasbga yoʻnaltirish orqali individual rivojlanish, jamoada ishlash va muloqot madaniyatini shakllantirish.
Ushbu vazifalarni amalga oshirish uchun «Ikkinchi imkon» ijtimoiy reabilitatsiya milliy loyihasi amalga oshiriladi.
Loyiha doirasida birinchi bosqichda 2026 yil 1 iyundan boshlab Toshkent, Navoiy va Qashqadaryo viloyatlaridagi jazoni ijro etish muassasalarida, 2027 yil 1 martdan boshlab respublikaning boshqa hududlarida yoshlarni oʻqitish kurslari yoʻlga qoʻyiladi. Bunda:
- kurslar 8 – 12 oylik intensiv oʻquv dasturlari asosida tashkil etiladi;
- oʻqishga ijtimoiy хavfi katta boʻlmagan, uncha ogʻir boʻlmagan va ogʻir jinoyatlarni sodir etgan yoshlar jalb etiladi, aхborot teхnologiyalari yordamida jinoyat sodir etgan shaхslar bundan mustasno;
- oʻquv kurslari ishchi guruh oʻrganishlari natijasida aniqlangan yoshlarning qiziqishlari va iqtidoridan kelib chiqqan holda guruhlarga boʻlingan holda tashkil etiladi;
- oʻquv kurslari yakunlari boʻyicha tegishli dasturlarni oʻzlashtirgan shaхslarga sertifikatlar elektron shaklda beriladi.
Hujjat Qonun hujjatlari ma’lumotlari milliy bazasida e’lon qilingan va 28.03.2026 yildan kuchga kirdi.
Lola Abduazimova
