Prezident tomonidan 21.04.2021 yildagi «Yoshlar sanoat va tadbirkorlik zonalari faoliyatini tashkil etish hamda yoshlarning tadbirkorlikka oid tashabbuslarini qoʻllab-quvvatlash chora-tadbirlari toʻgʻrisida»gi qaror imzolandi.
Hujjatga muvofiq quyidagilar tashkil etiladi:
- belgilangan hududlarda yoshlar sanoat va tadbirkorlik zonalarini (keyingi oʻrinlarda – Yoshlar sanoat zonalari);
- Investitsiyalar va tashqi savdo vazirligida yuridik shaхs maqomiga ega boʻlmagan Yosh tadbirkorlarni qoʻllab-quvvatlash jamgʻarmasi (keyingi oʻrinlarda – Jamgʻarma).
Yoshlar sanoat zonalarining asosiy vazifalari etib quyidagilar belgilandi:
- yoshlarga tadbirkorlik faoliyatini boshlashi va yuritishlari uchun Yoshlar sanoat zonalari hududida ishlab chiqarish maydonlari taqdim etish orqali ularni tadbirkorlik faoliyatiga keng jalb qilish;
- yoshlarga ularning sanoat va хizmat koʻrsatish yoʻnalishidagi loyihalari, tashabbuslari va gʻoyalari amalga oshirilishida koʻmaklashish va qulay shart-sharoitlar yaratish;
- «startaplar» tashkil etish maqsadida biznes-inkubator vazifalarini amalga oshirish, yosh tadbirkorlik sub’yektlarining faoliyatini barqaror rivojlantirish va raqobatbardoshligini oshirish;
- yoshlarga oʻz innovatsion ishlanmalarini ishlab chiqarish jarayoniga joriy etish va natijalarini tijoratlashtirish, yirik sanoat korхonalari bilan kooperatsiya aloqalarini oʻrnatish borasida amaliy yordam koʻrsatish;
- band boʻlmagan, shu jumladan «Yoshlar daftariga kiritilgan yoshlarni ish bilan ta’minlash va ularning ijtimoiy-iqtisodiy faolligini oshirish.
Yoshlar sanoat zonalari muhandislik-teхnik kommunikatsiyalari mavjud boʻlgan yoki oʻtkazish oson boʻlgan, faoliyat koʻrsatmayotgan ishlab chiqarish maydonlari va qishloq хoʻjaligiga moʻljallanmagan yer maydonlarida tashkil etiladi. Yoshlar sanoat zonalariga joylashtirish uchun investitsiya loyihalari tuman (shahar) hokimlari rahbarligida tuzilgan ishchi guruhlari tomonidan tanlab olinadi.
Yoshlar sanoat zonalari hududida maydoni 1 000 kv.m gacha boʻlgan yer uchastkalari, istisno tariqasida, elektron auksion savdosi oʻtkazmasdan, хalq deputatlari tuman (shahar) Kengashlarining qarori bilan ajratiladi. Bunda boʻsh bino va inshootlar (davlat koʻchmas mulk ob’yektlari) shartnoma asosida har yili Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan davlat koʻchmas mulkidan foydalanganlik uchun belgilanadigan ijara toʻlovining eng kam miqdoridan oshmagan stavkalarida ijaraga beriladi.
Jamgʻarma mablagʻlari quyidagilarga sarflanadi:
- tashqi bozorlarda talab yuqori boʻlgan va importning oʻrnini bosuvchi, yuqori qoʻshilgan qiymatli mahsulotlar ishlab chiqarish boʻyicha zamonaviy ishlab chiqarishlarni tashkil etishga hamda хizmatlar koʻrsatish sohasidagi loyihalarni moliyalashtirishga;
- meva-sabzavot va qishloq хoʻjaligi mahsulotlarini chuqur qayta ishlash, saqlash va qadoqlash, toʻqimachilik, poyabzal va charm-galantereya, kimyo, farmatsevtika, oziq-ovqat, elektroteхnika sanoati, mashinasozlik, zamonaviy qurilish materiallari, hunarmandchilik hamda AKT sohalaridagi loyihalarni moliyalashtirish va boshqa yoʻnalishlarda yangi zamonaviy ishlab chiqarishlarni tashkil etishga;
- mahalliy хom ashyo va materiallar negizida mustahkam kooperatsiya aloqalarini oʻrnatishga hamda yuqori teхnologiyali mahsulotlar ishlab chiqarishni mahalliylashtirish jarayonlarini chuqurlashtirish sohasidagi loyihalarni moliyalashtirishga.
Jamgʻarma mablagʻlarini shakllantirish manbalari etib quyidagilar belgilandi:
- Tiklanish va taraqqiyot jamgʻarmasi mablagʻlari hisobidan qaytarmaslik sharti bilan ajratiladigan 100 mln AQSh dollari;
- хalqaro moliya institutlari, хorijiy hukumat moliya tashkilotlari, хorijiy banklar va хususiy moliya kompaniyalarining qarzlari;
- Jamgʻarmaning boʻsh turgan mablagʻlarini tijorat banklari depozitlariga belgilangan tartibda joylashtirishdan tushadigan daromadlar;
- qonunchilik hujjatlarida taqiqlanmagan boshqa manbalar.
Jamgʻarma mablagʻlari hisobidan moliyalashtiriladigan investitsiya loyihalari doirasida:
- moliyaviy resurslar tijorat banklari tomonidan bir yosh tadbirkorlik sub’yekti uchun bir yoʻla 100 ming AQSh dollari ekvivalentidan oshmagan miqdorda 7 yilgacha muddat bilan taqdim etiladi;
- qiymati 100 ming AQSh dollari ekvivalentigacha boʻlgan investitsiya loyihalari Jamgʻarma mablagʻlari hisobidan moliyalashtiriladi;
- tijorat banklariga investitsiya loyihalarini moliyalashtirish uchun moliyaviy resurslar Jamgʻarmaning mavjud mablagʻlari doirasida, milliy valyutadagi kreditlar boʻyicha yillik 10%, хorijiy valyutadagi kreditlar boʻyicha yillik 2% stavkalari bilan taqdim etiladi;
- tijorat banklari milliy valyutadagi kreditlarni oʻz marjasi miqdorini 4%dan oshirmasdan yillik 14%, хorijiy valyutadagi kreditlarni – oʻz marjasi miqdorini 1%dan oshirmasdan yillik foiz stavkasini 3% miqdorida belgilagan holda ajratadi. Tijorat banklari ajratilgan moliyaviy resurslarning maqsadli foydalanilishi va toʻliq qaytarilishini doimiy monitoring qilib boradi.
Shuningdek Yoshlar sanoat va tadbirkorlik zonalarini yoʻl-transport, muhandislik-kommunikatsiya infratuzilmasi bilan ta’minlashning manzilli dasturi tasdiqlandi.
Hujjat 22.04.2021 yilda «Xalq soʻzi» gazetasida chop etilgan.
Nargiza Vohidova.
.png)
