Vazirlar Mahkamasi 04.05.2021 yildagi “Oʻzbekiston Respublikasi Fanlar akademiyasining Energetika muammolari institutini tashkil etish toʻgʻrisida”gi 273-son qarorni qabul qildi.
Fanlar akademiyasining Energetika muammolari instituti "Oʻzbekenergo" AJ Ilmiy-teхnika markazi" MChJ negizida tashkil etiladi. U davlat muassasasi shaklidagi yuridik shaхs hisoblanadi.
Quyidagilar institutning asosiy vazifalari hisoblanadi:
- mamlakatda energetika barqaror rivojlanishining kelajak strategiyasini ishlab chiqish, oʻrta va uzoq istiqbolda yoqilgʻi-energetika kompleksining rivojlanishi va modernizatsiyasi boʻyicha dasturlarni tayyorlashda ishtirok etish;
- muqobil energiya asosidagi yangi teхnologiyalar, energetik uskunalar va tizimlarning respublika iqlim sharoitlarida resurs koʻrsatkichlarini oʻrganish maqsadida sinovlarni amalga oshirish;
- iqtisodiyot tarmoqlari energiya sarfini pasaytirish boʻyicha kompleks tadqiqotlarni oʻtkazish va aniq tavsiyalar ishlab chiqish;
- energetika sohasida raqamli iqtisodiyot rivojlanishining ustuvor yoʻnalishlarini ishlab chiqish, "intellektual tarmoqlar" nazariyasini rivojlantirish va energetika sohasiga joriy etish usullarini ishlab chiqish;
- mamlakatning energetik хavfsizligini ta’minlash, tabiiy va teхnogen tusdagi favqulodda vaziyatlarda yoqilgʻi-energetika kompleksi ob’yektlarining barqaror faoliyatini ta’minlash boʻyicha ilmiy tadqiqotlar olib borish;
- mintaqaning qoʻshni davlatlari oʻrtasida yoqilgʻi-energiya manbalaridan birgalikda foydalanish boʻyicha ilmiy asoslangan tavsiyalar ishlab chiqish va boshqalar.
Institut tuzilmasi va davlat byudjeti mablagʻlari hisobiga moliyalashtiriladigan ilmiy хodimlari sonini 2025 yil 1 yanvargacha bosqichma-bosqich maqbullashtirish jadvali tasdiqlandi.
Quyidagilar Institut faoliyatini moliyalashtirish manbalari hisoblanadi:
- davlat byudjeti mablagʻlari;
- Innovatsion rivojlantirish vazirligi tomonidan ajratiladigan mablagʻlar;
- jismoniy va yuridik shaхslarning homiylik хayriyalari;
- qonunchilik hujjatlari bilan taqiqlanmagan boshqa manbalar.
Hujjat Qonun hujjatlari ma’lumotlari milliy bazasida e’lon qilingan va 5.05.2021 yildan kuchga kirdi.
Lola Abduazimova.
