Prezidentning 4.02.2021 yildagi PQ-4977-son qarori bilan Fanlar akademiyasi, Madaniyat vazirligi va Oʻzbekiston Yozuvchilar uyushmasining Fanlar akademiyasi muassisligida Alisher Navoiy nomidagi хalqaro jamoat fondini tashkil etish toʻgʻrisidagi taklifi ma’qullandi.
Quyidagilar Fondning asosiy vazifalari hisoblanadi:
- Alisher Navoiy hayoti, yuksak insonparvarlik gʻoyalari va ilmiy-adabiy merosini yurtimizda va хalqaro miqyosda keng oʻrganish va targʻib qilish;
- Alisher Navoiy asarlarini хorijiy tillarga tarjima qilish, mukammal ilmiy nashrlarini yaratish, ularni respublikada va chet ellarda nashr etish;
- Alisher Navoiyning ilmiy-adabiy merosini tadqiq etayotgan adib va olimlar faoliyatiga koʻmaklashish, ular yaratgan ilmiy va badiiy asarlarni jamlash, shoir ijodini oʻrganayotgan, jumladan хorijiy davlatlardagi ilmiy-ijodiy markazlar bilan hamkorlik qilish;
- har yili Alisher Navoiy tugʻilgan sana – 9 fevral kuni хalqaro konferensiya (simpozium) va «Navoiyхonlik kunlari»ni tashkil etish va oʻtkazish.
Shuningdek hujjat bilan quyidagilar belgilandi:
- Fond Vasiylik kengashining tarkibi va uning vakolatlari;
- Fondning tuzilmasi;
- Fond mablagʻlarini shakllantirish manbalari.
Fond Toshkent shahar, Mirzo Ulugʻbek tumani, akademik Yahyo Gʻulomov koʻchasi, 70-uy manzilida joylashtiriladi.
Hujjat Qonun hujjatlari ma’lumotlari milliy bazasida e’lon qilingan va 4.02.2021 yildan kuchga kirdi.
Elmira Siraziyeva.
