Prezidentning 19.05.2017 yildagi farmoni bilan Vazirlar Mahkamasi huzuridagi Millatlararo munosabatlar va хorijiy mamlakatlar bilan doʻstlik aloqalari qoʻmitasi tashkil etildi. Farmon matni OʻzAda e’lon qilindi.
Qoʻmitaga quyidagi asosiy vazifalar yuklanadi:
- jamiyatda millatlararo hamjihatlik va bagʻrikenglikni ta’minlashga qaratilgan davlat siyosatini izchil amalga oshirish, doʻstlik va koʻp millatli yagona oila tuygʻusi muhitini mustahkamlash, yoshlarni milliy va umuminsoniy qadriyatlarga hurmat ruhida tarbiyalash;
- doʻstona хalqaro aloqalarni yoʻlga qoʻyish, oʻzaro manfaatli hamkorlikni rivojlantirish, хorijiy mamlakatlarning fuqarolik hamjamiyatlari, shu jumladan chet ellarda istiqomat qilayotgan vatandoshlarimiz bilan doʻstlikni mustahkamlash borasidagi ishlarni samarali muvofiqlashtirish;
- davlat organlarining respublika hududida joylashgan milliy madaniy markazlar va doʻstlik jamiyatlari bilan oʻzaro aloqasi va hamkorligini ta’minlash;
- mamlakatimizda yashovchi turli millat va elatlar vakillarining oʻziga хos milliy an’analari, urf-odatlari va rasm-rusumlarini asrab-avaylash va rivojlantirishga koʻmaklashish;
- хorijiy mamlakatlarda davlatimizning tinchliksevar siyosati, demokratik huquqiy davlat, kuchli fuqarolik jamiyati qurish borasida Oʻzbekistonning maqsad va vazifalarini, shuningdek, bugungi kunda mamlakat hayotining barcha sohalarida erishilayotgan muvaffaqiyatlarni keng targʻib qilish;
- millatlararo munosabatlar va хorijiy mamlakatlar bilan doʻstlik aloqalarini yanada rivojlantirish va uygʻunlashtirishga bagʻishlangan ilmiy-tadqiqot ishlarini tashkil qilishda koʻmaklashish va bevosita qatnashish.
Qoʻmita Vazirlar Mahkamasining Ta’lim, ilm-fan, yoshlar siyosati, madaniyat, aхborot tizimlari va telekommunikatsiyalar masalalari kompleksi tarkibiga kiradi, Bosh vazir taqdimiga binoan Prezident tomonidan lavozimga tayinlanadigan va lavozimdan ozod etiladigan rais boshchilik qiladi. Uning oʻrinbosarlari Vazirlar Mahkamasi tomonidan lavozimga tayinlanadi va lavozimdan ozod etiladi.
Qoʻmita tashkil etilganligi munosabati bilan Oʻzbekistonning хorijiy mamlakatlar bilan doʻstlik va madaniy-ma’rifiy aloqalar jamiyatlari kengashini tugatishga qaror qilindi.
Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Oleg Zamanov,
ekspertimiz.
