Vazirlar Mahkamasining 10.08.2022 yildagi «Iхtirochilik va ratsionalizatorlik faoliyatini qoʻllab-quvvatlash chora-tadbirlari toʻgʻrisida»gi 440-son qarori qabul qilindi.
Qarorga muvofiq nodavlat notijorat tashkilot shaklidagi Oʻzbekiston iхtirochilar va ratsionalizatorlar jamiyati tashkil etiladi.
Jamiyatning asosiy vazifalari quyidagilardan iborat:
- respublika iqtisodiyotining barcha tarmoqlarida iхtirochilik faoliyatini rivojlantirish;
- davlat boshqaruvchi organlari hamda ustav fondida davlat ulushi 50% va undan yuqori boʻlgan tashkilotlarning iхtirochilik faoliyatini ragʻbatlantirish;
- koʻrgazmalar va koʻrik-tanlovlar oʻtkazish.
2022 yildan boshlab har yili hududlar, tarmoqlar va sohalar kesimida iхtirochilik va ratsionalizatorlik boʻyicha koʻrik-tanlovlar oʻtkaziladi. Tanlovlar gʻoliblariga quyidagi miqdorda pul mukofotlari beriladi:
- 1-oʻrin – 300 BHM;
- 2-oʻrin – 250 BHM;
- 3-oʻrin – 200 BHM.
Ushbu mablagʻlar Ilm-fanni moliyalashtirish va innovatsiyalarni qoʻllab-quvvatlash jamgʻarmasi hisobidan qoplanadi.
Hujjat Qonun hujjatlari ma’lumotlari milliy bazasida e’lon qilingan va 10.08.2022 yildan kuchga kirdi.
Lola Abduazimova.