Vazirlar Mahkamasining 29.11.2024 yildagi “Respublika ijro etuvchi hokimiyat organlari funksiyalarining ochiq reyestrini yuritish chora-tadbirlari toʻgʻrisida”gi VMQ-796-son qarori qabul qilindi.
Reyestrni yuritishning asosiy maqsadi respublika ijro etuvchi hokimiyat organlarining funksiyalarini tizimlashtirish, monitoring qilish va ular toʻgʻrisidagi ma’lumotlarning yagona ochiq elektron aхborot bazasini shakllantirish, shuningdek, ularning faoliyati samaradorligi hamda natijadorligini oshirish boʻyicha ta’sirchan choralarni belgilash hisoblanadi.
Hujjat bilan Respublika ijro etuvchi hokimiyat organlari funksiyalari ochiq reyestrini yuritish tartibi toʻgʻrisida nizom tasdiqlandi, u quyidagilarni tartibga soladi:
- respublika ijro etuvchi hokimiyat organlarining funksiyalari toʻgʻrisidagi ma’lumotlarni ochiq reyestrga kiritish, oʻzgartirish va qoʻshimchalar kiritish, shuningdek, undan ma’lumotlarni oʻchirish;
- reyestrga kiritilishi lozim boʻlgan ijro etuvchi hokimiyat organlarining funksiyalari toʻgʻrisidagi aхborot manbalari va turlari;
- ijro etuvchi hokimiyat funksiyalari pasportini shakllantirish;
- vakolatli organ va ijro etuvchi hokimiyat organlarining huquq va majburiyatlari.
Reyestr Adliya vazirligi tomonidan "Davlat funksiyalari" avtomatlashtirilgan onlayn aхborot tizimida shakllantiriladi va yuritiladi. Nizom talablari mahalliy ijro etuvchi hokimiyat organlari funksiyalarining ochiq reyestrini yuritishga ham tatbiq etiladi.
Hujjat Qonun hujjatlari ma’lumotlari milliy bazasida e’lon qilingan va 03.12.2024 yildan kuchga kirdi.
Lola Abduazimova
