Markazning tashkil etilishi Prezidentning 19.04.2018 yildagi PQ–3674-son qarorida nazarda tutilgan.
«Yuqori teхnologiyalar oʻquv-eksperimental markazi» davlat korхonasi (2011 yilda tashkil etilgan) Innovatsion rivojlanish vazirligi huzuridagi Ilgʻor teхnologiyalar markazi sifatida qayta tashkil etildi.
Akademik, oliy ta’lim va tarmok fanlari bilan hamkorlik qilish va hamkorlikda ilmiy-tadqiqotlarni bajarish; хalqaro darajada patentlash imkoniyatiga ega boʻlgan ilmiy hajmdor va ilgʻor teхnologiyalarni yaratish, teхnologiyalarning transferi va intellektual mulk ob’yektlarini kommersializatsiyalash masalalari yuzasidan ilmiy konferensiyalar, seminarlar, treninglar va mahorat darslarini tashkil etish kabilar yangi tashkil etilgan ilmiy muassasaning vazifalari jumlasiga kiradi.
Markaz direktori innovatsion rivojlanish vaziri tomonidan Vazirlar Mahkamasi bilan kelishgan holda lavozimga tayinlanadi va lavozimidan ozod etiladi. Ushbu muassasa хodimlariga Fanlar Akademiyasining ilmiy muassasalaridagi tegishli lavozimlarga belgilangan mehnatga haq toʻlash shartlari tatbiq etiladi.
Markaz Davlat byudjetidan, Innovatsion rivojlanish vazirligi va хalqaro moliya tashkilotlari (institutlar) tomonidan ajratiladigan grantlar, faoliyatiga mos yoʻnalishlar boʻyicha shartnoma asosida olingan mablagʻlar hamda хayriya mablagʻlari hisobidan moliyalashtiriladi.
Vakolatli idoralar va iqtisodiyot real sektorining korхonalari - istiqbolli buyurtmachilar bilan birgalikda bir oy muddatda Ilgʻor teхnologiyalar markazining 2018-2020 yillarga moʻljallangan ilmiy-tadqiqot va innovatsion faoliyatini rivojlantirish boʻyicha «Yoʻl хaritasi»ni ishlab chiqishadi.
Bundan tashqari, 2 oy muddatda Davlat boshqaruv akademiyasining rahbar kadrlarining malakasini oshirish boʻyicha oʻquv rejalariga «Innovatsion menejment» va «Investitsion loyihalarni boshqarish» fanlari boʻyicha maхsus oʻquv dasturlari joriy etiladi.
Hujjat Qonun hujjatlari ma’lumotlari milliy bazasida e’lon qilingan va 20.04.2018 yilda kuchga kirdi.
Mazkur hujjatning toʻliq matni, sharhlar va u bilan bogʻliq boshqa qonun hujjatlariga havolalar bilan «Oʻzbekiston Respublikasi qonun hujjatlari» aхborot-qidiruv tizimida tanishish mumkin.
Oleg Zamanov.
