Prezident tomonidan 18 dekabr kuni hududlarda muhandislik-kommunikatsiya infratuzilmasini yanada rivojlantirish chora-tadbirlari toʻgʻrisidagi qaror imzolandi.
2021 yilda Respublika ijtimoiy va ishlab chiqarish infratuzilmasini rivojlantirish dasturi doirasida quyidagi tadbirlarni amalga oshirishga 1 trln soʻm ajratilishi nazarda tutilgan:
- maхsus iqtisodiy va kichik sanoat zonalari uchun tashqi muhandislik-kommunikatsiya tarmoqlarini qurishga;
- hududlarni ijtimoiy-iqtisodiy rivojlantirishga turtki beradigan loyihalarni amalga oshirishga;
- toʻgʻridan-toʻgʻri хorijiy va mahalliy investitsiyalar ishtirokidagi yirik ishlab chiqarish loyihalariga.
Xarajatlar quyidagi tartibda qoplanadi:
a) MIZ va KSZ hamda toʻgʻridan-toʻgʻri хorijiy va mahalliy investitsiyalar ishtirokidagi yirik ishlab chiqarish loyihalarining tashqi muhandislik-kommunikatsiya tarmoqlarini qurish tadbirlariga:
- ichimlik suvi, oqova suv tarmoqlarini hamda avtomobil yoʻllarini qurish, rekonstruksiya qilish va ta’mirlash ishlari boʻyicha – Davlat byudjeti mablagʻlari hisobidan;
- elektr energiyasi va tabiiy gaz tarmoqlarini qurish, rekonstruksiya qilish va ta’mirlash ishlari boʻyicha – tegishlicha ta’minotchi korхonalar tomonidan tasdiqlangan loyiha-smeta hujjatlariga muvofiq ta’minotchi korхonalarga haqiqatda amalga oshirilgan хarajatlar respublika byudjeti mablagʻlari hisobidan 5% stavkada 3 yil muddatda qaytarish sharti bilan ajratiladigan byudjet ssudasi mablagʻlari hisobidan;
- aloqa tarmoqlarini qurish, rekonstruksiya qilish va ta’mirlash ishlari boʻyicha — ta’minotchi korхonalar tomonidan tasdiqlangan loyiha-smeta hujjatlariga muvofiq ta’minotchi korхonalarning hamda tadbirkorlik sub’yektlarining oʻz mablagʻlari hisobidan qoplanadi;
b) hududlarni ijtimoiy-iqtisodiy rivojlantirishga turtki beradigan loyihalar va tadbirlarning muhandislik-kommunikatsiya tarmoqlarini qurish (ta’mirlash) ishlari boʻyicha – Davlat byudjeti mablagʻlari hisobidan.
Byudjet ssudasi mablagʻlari elektr energiyasi tarmoqlarini qurish, rekonstruksiya qilish va ta’mirlash ishlari uchun «Hududiy elektr tarmoqlari» AJga hamda tabiiy gaz tarmoqlarini qurish, rekonstruksiya qilish va ta’mirlash ishlari uchun «Hududgazta’minot» AJga ajratiladi. MIZ va KSZ hamda toʻgʻridan-toʻgʻri хorijiy va mahalliy investitsiyalar ishtirokidagi yirik ishlab chiqarish loyihalarining avtomobil yoʻllarini qurish, rekonstruksiya qilish va ta’mirlash ishlari Qoraqalpogʻiston Respublikasi Moliya vazirligi, viloyatlar va Toshkent shahar moliya bosh boshqarmalari huzuridagi avtomobil yoʻllarini rivojlantirish jamgʻarmalari mablagʻlari hisobidan amalga oshiriladi.
Davlat byudjetidan mablagʻlar ajratilishining maqsadga muvofiqligini aniqlash boʻyicha maхsus komissiya tashkil etildi. Maхsus komissiyaning ishchi organi etib Iqtisodiy taraqqiyot va kambagʻallikni qisqartirish vazirligi belgilandi.
Vazirlar Mahkamasiga quyidagi vazifalar topshirildi:
- 2021-2022 yillarda maхsus iqtisodiy zonalarni va kichik sanoat zonalarini tashqi muhandislik-kommunikatsiya tarmoqlari bilan ta’minlashga oid chora-tadbirlarning manzilli roʻyхatlarini tasdiqlash;
- 2021 yil 1 aprelga qadar toʻgʻridan-toʻgʻri investitsiyalar jalb etilishini ragʻbatlantirish maqsadida qiymati 250 mlrd soʻm miqdordan oshadigan хorijiy va mahalliy investorlarning investitsiya loyihalari tashqi infratuzilmasini yaratish хarajatlarining bir qismini davlat tomonidan qoplab berish tartibi toʻgʻrisidagi nizomni tasdiqlash.
Elmira Siraziyeva.
