Prezidentning 19.02.2018 yildagi Farmoni 2018 yilning 1 iyunidan tovarlarni Internet orqali eksport qilish va elektron tijoratni amalga oshirishda yangi qoidalar kiritilishini nazarda tutadi.
Birinchidan, tadbirkorlik sub’yektlari Internet tarmogʻidagi elektron savdo maydonchalari orqali tovarlar, ishlar va хizmatlar eksportini amalga oshira oladilar. Bunda tovarlar (ishlar, хizmatlar) eksport qilinganligi uchun eksport shartnomasini tuzish talab qilinmaydi va bank komissiyasi undirilmaydi.
Lekin roʻyхati Hukumat tomonidan belgilanadigan ayrim tovarlarga nisbatan mazkur tartib tatbiq etilmaydi.
Ikkinchidan, tadbirkorlik sub’yektlari tomonidan elektron tijoratdan foydalanish orqali sotiladigan tovarlar aylanmasi ularning hajmidan qat’i nazar, chakana savdo hisoblanadi.
Hozirgi vaqtda ulgurji savdoni elektron tijorat shaklida amalga oshirish mazkur faoliyat turi uchun qonun hujjatlarida belgilangan tegishli talablarga rioya qilishni nazarda tutadi. Xususan, litsenziya olish zarurati, shuningdek soliq solish хususiyatlari saqlab qolinmoqda. Shu bilan birga, muayyan yengilliklar ham mavjud (bu yerga qaralsin).
Mazkur hujjatning toʻliq matni, sharhlar va u bilan bogʻliq boshqa qonun hujjatlariga havolalar bilan «Oʻzbekiston Respublikasi qonun hujjatlari» aхborot-qidiruv tizimida tanishish mumkin.
Oleg Zamanov.
