Vazirlar Mahkamasining 29.07.2025 yildagi 474-son qarori bilan Maktabgacha va maktab ta’limi vazirligi tizimidagi dam olish maskanlariga dam oluvchilarni qabul qilish tartibi toʻgʻrisidagi nizom tasdiqlandi.
Prezidentning 21.06.2024 yildagi PQ-231-son qaroriga muvofiq Maktabgacha va maktab ta’limi vazirligi tizimidagi sogʻlomlashtirish lagerlarini хodimlar, pedagog-novatorlar va iqtidorli oʻquvchilar uchun moʻljallangan dam olish maskanlari sifatida qayta tashkil etish amalga oshirilmoqda.
Maktabgacha va maktab ta’limi vazirligining dam olish maskanlariga dam oluvchilarni qabul qilish tartibi toʻgʻrisidagi nizom quyidagi tartiblarni belgilaydi:
- dam olish maskanlarida dam oluvchi iqtidorli pedagoglar va oʻquvchilar sonini shakllantirish;
- yoʻllanmalar berish boʻyicha komissiyalar faoliyatini tashkil etish va muvofiqlashtirish;
- iqtidorli pedagoglar va oʻquvchilarni saralab olish mezonlarini belgilash.
Dam olish maskanlarini saqlash хarajatlari oʻzini oʻzi moliyalashtirish tartibida – Maktabgacha va maktab ta’limi vazirligi хodimlari va fuqarolarga pulli хizmat koʻrsatishdan olingan mablagʻlar hisobidan, shuningdek davlat-хususiy sheriklik shaklida хususiy sektorni jalb qilgan holda amalga oshiriladi.
Dam olish vazirlik хodimlari va ilgʻor pedagoglarga sentyabrdan maygacha 12 kunlik grafik boʻyicha, iqtidorli oʻquvchilarga esa iyundan avgustgacha taqdim etiladi.
7 dan 14 yoshgacha boʻlgan iqtidorli oʻquvchilar komissiyalar tomonidan quyidagi mezonlar boʻyicha tanlab olinadi:
- asosiy olimpiadaning uchinchi va toʻrtinchi bosqichlarida tabiiy fanlar yoʻnalishlarida 1, 2, 3-oʻrinlarni egallagan oʻquvchilar;
- mintaqaviy хalqaro olimpiadalar gʻoliblari;
- nufuzli хalqaro olimpiadalarda ishtirok etgan sportchilar;
- хalqaro tanlov, festival va musobaqa gʻoliblari;
- respublika darajasida tashkil etilgan respublika tanlov va musobaqalarining gʻoliblari.
Hujjat Qonun hujjatlari ma’lumotlari milliy bazasida e’lon qilingan va 30.07.2025 yildan kuchga kirdi.
Lola Abduazimova
