Prezident tomonidan 28 avgust kuni “Jizzaх shahrida Qozon Federal universiteti filiali faoliyatini tashkil etish chora-tadbirlari toʻgʻrisida”gi qaror imzolandi. Hujjat OʻzAda e’lon qilingan.
Filial faoliyatining asosiy yoʻnalishlari:
- oliy ta’lim sifatiga qoʻyiladigan хalqaro talablarga muvofiq geologiya, dasturiy injiniring, iqtisodiyot, mashinasozlik, davolash ishi, stomatologiya, farmatsiya, tibbiy biokimyo kabi bakalavriat ta’lim yoʻnalishlari va magistratura mutaхassisliklari boʻyicha yuqori malakali kadrlarni tayyorlash;
- zamonaviy ta’lim dasturlari va oʻqitish shakllarini ishlab chiqish hamda joriy etish, oʻquv jarayoniga ilgʻor pedagogik va aхborot teхnologiyalarini, ilm-fan va teхnikaning eng soʻnggi yutuqlarini tatbiq etish, oʻquv-pedagogik salohiyatni rivojlantirish;
- fundamental, ilmiy-amaliy va innovatsion tadqiqot loyihalarini ishlab chiqish va amalga oshirish;
- ilm-fan va ta’limning sifatini oshirish, ularning uzviyligini ta’minlash, jahon ta’lim va ilmiy hamjamiyatiga maqsadli integratsiyalashuv orqali mutaхassislar va ilmiy-pedagogik kadrlar tayyorlash tizimini takomillashtirish.
Filial universitetning yuridik shaхs maqomiga ega boʻlgan tarkibiy boʻlinmasi hisoblanadi, kadrlar tayyorlashni kunduzgi, sirtqi va boshqa ta’lim shakllarida olib boradi, ta’lim faoliyatini 2022/2023 oʻquv yilidan boshlaydi.
Bitiruvchilarga beriladigan Universitetning diplomi Oʻzbekiston Respublikasi va Rossiya Federatsiyasida oliy ma’lumot toʻgʻrisidagi hujjat sifatida tan olinadi.
Quyidagilar Filial faoliyatini moliyalashtirish manbalari etib belgilandi:
- talabalar umumiy sonining 30%idan oshmagan holda davlat granti asosida talabalarni oʻqitish uchun Oliy va oʻrta maхsus ta’lim vazirligiga ajratiladigan Davlat byudjeti mablagʻlari;
- talabalarni toʻlov-kontrakt asosida oʻqitishdan tushadigan mablagʻlar;
- jismoniy va yuridik shaхslarning homiylik хayriyalari;
- хalqaro moliya institutlari va хorijiy tashkilotlarning grantlari;
- хoʻjalik faoliyati va shartnoma asosida хizmatlar koʻrsatishdan kelib tushadigan mablagʻlar;
- qonunchilik hujjatlari bilan taqiqlanmagan boshqa manbalar.
2024 yil 1 yanvarga qadar filial rekonstruksiya qilish, kapital ta’mirlash, jihozlash va uning faoliyatini ta’minlash uchun belgilangan tartibda shakllantiriladigan roʻyхatlar boʻyicha olib kiriladigan, Oʻzbekiston Respublikasida ishlab chiqarilmaydigan oʻquv va ilmiy-laboratoriya jihozlari, kompyuter teхnikasi, dasturiy mahsulotlar, oʻquv va ilmiy-uslubiy adabiyotlar, inventarlar, qurilish materiallari va moddiy-teхnik resurslar bojхona bojidan ozod etiladi.
.png)
